На беразе Мінскага мора зносяць Riviera Country Club
Вось ужо сапраўды, сыходзіць эпоха: на беразе Мінскага мора актыўна зносяць Riviera Country Club, які некалі грымеў сваімі вечарынамі. Танцы, музыка, начное жыццё — у другой палове дзясятых гадоў такі вольны час карыстаўся вялікім попытам.
Зараз жа на месцы былых рэйваў — груда абломкаў, піша Onliner.by.
Riviera Country Club знаходзіцца за 9 км ад МКАД, проста ля воднай роўнядзі Заслаўскага вадасховішча. Ён адкрыўся тут у маі 2016 года і складаўся з вялікага будынка рэстарана, невялікага гатэля, шатра і прычала. Здавалася, што такая лакацыя назаўсёды забяспечыць комплексу высокую наведвальнасць і папулярнасць.
Спачатку так і было: людзі прыязджалі сюды на карпаратывы, у рэстаран, паляжаць на пляжы, патанчыць на опэн-эйрах. Карпаратывы і тусоўкі працягваліся і ў наступным дзесяцігоддзі, але ўжо не так гучна. Час ідзе, і ў масавай свядомасці змяняюцца ўяўленні пра класны адпачынак. Гучныя вечарынкі змяніліся больш камернымі, танцы на пляжах — пасядзелкамі ў барах.
У 2020 годзе стала вядома, што загарадны клуб выставілі на продаж. Новага ўладальніка шукалі за $2,4 мільёна, праўда, уласнікі былі згодныя на невялікі торг.
Чым скончыўся пошук, невядома. Апошнія водгукі пра лакацыю ў інтэрнэце датуюцца 2022 годам. Доўгі час аб'ект выглядаў закінутым. А цяпер будынкі і зусім вырашылі знесці.
Асноўны будынак рэстарана ўжо зраўнялі з зямлёй. Наступны на чарзе — двухпавярховы гатэль.
Інфармацыя пра тое, што менавіта з'явіцца на вызваленай ад былой забудовы тэрыторыі, нідзе шырока не асвятлялася.
Мяркуючы з даных Публічнай кадастравай карты, у 2024 годзе статус зямельнага ўчастка змянілі на наступны: «Зямельны ўчастак для будаўніцтва і абслугоўвання турыстычнага комплексу (першая чарга будаўніцтва), артэзіянскіх свідравін па аб'екце «Турыстычны комплекс, які ўключае будаўніцтва стацыянарнага кафэ, летніх веранд, арганізацыі пракату і захоўвання спартыўнага інвентару, вадаплаўных сродкаў, абсталявання зоны адпачынку на тэрыторыі Мінскага раёна. I і II чаргі».
Атрымліваецца, замест былога загараднага клуба з'явіцца новы, падобны па функцыянале.