Па беларускіх лясах масава ставяць стэнды з QR-кодамі

У лясах Беларусі пачалі масава ставіць новыя інфармацыйныя стэнды. Міністэрства лясной гаспадаркі паведаміла, што праводзіць такую працу ва ўсіх рэгіёнах краіны.

Стэнды вырабляюць паводле адзінага стандарту. Іх галоўная асаблівасць — убудаваныя QR-коды, праз якія са смартфона можна атрымаць доступ да розных лічбавых сэрвісаў.

Непасрэдна ў лесе можна даведацца, якія лесагаспадарчыя работы або высечкі праводзяцца на канкрэтным участку, праверыць актуальную карту забарон і абмежаванняў на наведванне лясоў у залежнасці ад пажарнай небяспекі, аформіць заказ на куплю дроў праз інтэрнэт, а таксама азнаёміцца з інструкцыяй, як дзейнічаць у выпадку, калі чалавек заблукаў у лесе.

У Міністэрстве лясной гаспадаркі адзначаюць, што такая сістэма павінна зрабіць інфармацыю пра вядзенне лясной гаспадаркі больш даступнай і празрыстай. Акрамя таго, стэнды могуць служыць дадатковымі арыенцірамі для турыстаў і грыбнікоў.

Падобныя інфармацыйныя элементы ўжо выкарыстоўваюцца ў некаторых рэгіёнах Беларусі, у тым ліку ў ландшафтным заказніку «Азёры» пад Гроднам і на інклюзіўнай экалагічнай сцежцы «Падарожжа ў прыроду без перашкод» у Расонскім раёне.

Каментары да артыкула