У Непале раптоўная паводка знесла да 40 дамоў і некалькі мастоў ВІДЭА
Раптоўная паводка на рацэ Будхі-Гандакі разбурыла паселішчы і пашкодзіла будоўлю гідраэлектрастанцыі. Ратавальнікі эвакуююць людзей верталётамі. Прычынай стыхіі мог стаць апоўзень, які перагарадзіў прыток ракі.
Паводка пачалася раніцай 11 кастрычніка ў раёне Горкха ў Непале. Паводле папярэдняй ацэнкі мясцовых уладаў, паток знёс каля 40 дамоў у трох паселішчах, паведамляе The Kathmandu Post.
Чатыры чалавекі, якія знаходзіліся ў пабудове на беразе ракі ў Чумчэце, лічацца зніклымі без вестак. Асобна паведамляецца пра страту сувязі з групай з чатырох-пяці пастухоў.
Непальскія вайскоўцы вывезлі верталётам шэсць чалавек з паселішча Джагат, якому пагражаюць апоўзні. Афіцыйных звестак пра загінулых ці параненых пакуль няма.
Вада знішчыла пешаходныя і аўтамабільныя масты, у тым ліку мост паміж раёнамі Горкха і Дхадынг. На будоўлі гідраэлектрастанцыі паток знёс будаўнічы лагер частку абсталявання. Яшчэ ад 20 да 22 дамоў у паселішчы Салеры застаюцца пад пагрозай.
Паводле Дэпартамента гідралогіі і метэаралогіі, апоўзень мог перакрыць адзін з прытокаў Будхі-Гандакі. Пасля прарыву гэтай перашкоды вада магла хлынуць уніз і выклікаць паводку.
Улады папярэдзілі жыхароў ніжэй па цячэнні пра вельмі высокую рызыку новых затапленняў.