Каранік не забраў з сабой у Мінск падпалкоўніка, які быў яго прэс-сакратаром. Таму знайшлі новае месца
Сяргей Шаршаневіч шэсць гадоў кіраваў прэс-службай Гродзенскага аблвыканкама, большую частку з якіх пры Уладзіміру Караніку. Да гэтага ён сем гадоў быў тварам Следчага камітэта Гродзеншчыны і праславіўся тым, што прапанаваў Леаніду Якубовічу замяніць дзве шкатулкі на шкатулкі, зробленыя вязнямі Ваўкавыскай калоніі.
Сяргей Шаршаневіч крайні правы. Фота: t.me/oao_giap_belarus
Стала вядома, куды з пасады кіраўніка прэс-службы Гродзенскага аблвыканкама «размеркавалі» Сяргея Шаршаневіча, чыё месца нядаўна заняла маладая прапагандыстка Юлія Карняловіч.
Можна было б падумаць, што ў Шаршаневіча ёсць шансы пераехаць у Мінск следам за сваім шматгадовым начальнікам Уладзімірам Каранікам, які ўзначаліў Акадэмію навук, — але не.
Сілавіка адправілі намеснікам дырэктара па ідэалогіі ў ААТ «ГІАП» — Гродзенскі навукова-даследчы і праектны інстытут азотнай прамысловасці і прадуктаў арганічнага сінтэзу.
Гэта праектны інстытут для хіміі і нафтахіміі. Ён з'явіўся ў 1968 годзе як гродзенскі аддзел маскоўскага ГІАП, а самастойным стаў у 1992 годзе. Цяпер гэта адкрытае акцыянернае таварыства ў складзе канцэрна «Белнафтахім», дзе працуе каля 500 чалавек.
Працаваць у Гродзенскім аблвыканкаме Шаршаневіч стаў у канцы 2020 года, неўзабаве пасля таго як Лукашэнка паставіў Уладзіміра Караніка кіраўніком у самую пратэсную вобласць.
Да таго Шаршаневіч у званні падпалкоўніка юстыцыі служыў у Следчым камітэце.
У 2003 годзе Шаршаневіч трапіў на «Поле цудаў» Леаніда Якубовіча і падарыў таму дзве шкатулкі, зробленыя рукамі вязняў Ваўкавыскай калоніі. Ён прапанаваў замяніць імі тыя, якімі Якубовіч карыстаўся пры розыгрышы аднайменнай міні-гульні ў рамках шоу.