Na Vałožynščynie adznačać uhodki Dunina-Marcinkieviča

4 lutaha biełarusy adznačajuć 205-hodździe z dnia naradžeńnia dramaturha, paeta, teatralnaha dziejača Vincenta Dunina-Marcinkieviča, paviedamlaje «Rehijanalnaja hazieta».

Asablivaja ŭvaha nadajecca ŭhodkam na Vałožynščynie: u falvarku Lucinka dramaturh pražyŭ bolš za dvaccać hadoŭ.

U biblijatecy projdzie litaraturnaja haścioŭnia

— Naša mierapryjemstva budzie nie nadta masavym, — raspaviadaje Alena Suhaka, zahadčyca dziciačaj biblijateki. — Napačatku my raskažam udzielnikam pra los našaha znakamitaha ziemlaka, zrobim ahlad tych knih, jakija jość u našaj biblijatecy, abmiarkujem tvory. Achvotnyja zmohuć pračytać vieršy Dunina-Marcinkieviča.

Litaraturnyja haścioŭni prachodziać u biblijatecy rehularna. Aktyŭny ŭdzieł u ich prymajuć udzielniki litaraturnaha kłuba «Kruhahlad».

Dom kultury prymie konkurs vykanaŭcaŭ

Rajonny konkurs vykanaŭcaŭ projdzie ŭ siaredzinie lutaha. Udzielničać u im mohuć i škoły, i ŭstanovy kultury.

Uzrostavych abmiežavańniaŭ konkurs nie maje. Adzinaje patrabavańnie — žadańnie pračytać vierš Dunina-Marcinkieviča ci padrychtavać insceniroŭku jaho dramatyčnych tvoraŭ.

— Aceńvać udzielnikaŭ budzie žury, — kaža Valancina Hiruć-Rusakievič, kiraŭnica narodnaha litaraturna-mastackaha abjadnańnia «Ruń». — U im źbiarucca pradstaŭniki adździełaŭ kultury, adukacyi, a taksama adździeła pa spravach moładzi. Pieramožcy atrymajuć nie tolki dypłomy, ale i padarunki.

— Da ŭhodkaŭ Dunina-Marcinkieviča my rychtujem słajd-prezientacyju, — raspaviadaje Natalla Łoŭčaja, dyrektar rajonnaha muzieja. — U takoj lohkaj dla razumieńnia formie my raskažam pra žyćcio i tvorčaść piśmieńnika. Na žal, nijakich jaho rečaŭ u fondzie niama — ni kresła, ni vopratki, ni stała. Tamu budziem vykarystoŭvać toje, što jość. Naprykład, fotazdymki jaho rodnych, jakija prylatali z Amieryki na minułyja ŭhodki, kali piśmieńniku spaŭniałasia 200 hadoŭ. Taksama zdymki miaścinaŭ, jakija doŭhi čas byli źviazanyja ź imiem dramaturha — archiŭnyja i sučasnyja vidy Lucinki. Našu pracu pakažam hledačam na konkursie ŭ Domie kultury.

Kančatkovaja data konkursu nie nazyvajecca. Pakul mierapryjemstva zapłanavanaje na 17 lutaha.

— Ciapier tolki pačynajecca hryp u našym rehijonie, — kaža dyrektar rajonnaha centra kultury Maryja Tur. — Kali da siaredziny lutaha chvaroba budzie pašyracca, to pieraniasiom konkurs na bolš poźni čas. Z kim ža jaho pravodzić, kali ludzi buduć chvareć?

Kamientary da artykuła