U Minsku buduć prezientavanyja tvory zorak litaraturnaj i fiłasofskaj dumki Jeŭropy

Fiestyval siaredniejeŭrapiejskaj litaratury, pieršy ŭ historyi Biełarusi, adbudziecca ŭ Minsku ŭ sakaviku. «Šenhienka» — heta mahčymaść paznajomicca ź litaraturnymi i fiłasofskimi tvorami jeŭrapiejskich zorak pieršaj vieličyni.

Inicyjatar prajekta — «Łabaratoryja navukovaha i mastackaha pierakładu», što abjadnoŭvaje pačatkoŭcaŭ i prafiesijanałaŭ u halinie pierakładu tekstaŭ z zamiežnych movaŭ, a taksama daśleduje i raspracoŭvaje biełaruskuju humanitarnuju navukovuju terminałohiju i pryncypy tranślitaracyi. Knihi sieryi «Siaredniaja Jeŭropa» — plon dvuchhadovaj dziejnaści łabaratoryi pa pierakładzie tvoraŭ sučasnych češskich, słavackich, vienhierskich i polskich aŭtaraŭ na biełaruskuju movu.

Suarhanizatar — kulturnickaja kampanija «Budźma biełarusami!», inicyjatyva, jakaja paŭstała ŭ siaredzinie «nulavych» i źjadnała bolšaść aktyŭnych pradstaŭnikoŭ ajčynnaj kultury dla pieraadoleńnia kulturnaj razroźnienaści biełarusaŭ. Kampanija farmuje modu na biełarusacentryčny padychod va ŭsich siektarach hramadstva. Padtrymka kampanijaj takich fiestyvalaŭ — važny krok dziela pašyreńnia jeŭrapiejskaha myśleńnia ŭ našaj krainie pa-biełarusku.

Raskład imprezaŭ fiestyvalu siaredniejeŭrapiejskaj litaratury «Šenhienka»

12 sakavika (aŭtorak). Paśla ŭračystaha adkryćcia, dzie vystupiać hanarovyja hości, adbudziecca litaraturnaja viečaryna «Multykulturnaja viza», pryśviečanaja fienomienu sučasnaj siaredniejeŭrapiejskaj litaratury, u jakoj aŭtary zmahli vyjści za vuzkija miežy nacyjanalnaha i ŭźnialisia da hłabalnaha suśvietnaha myśleńnia.

Knihi, jakija buduć prezientavacca na sustrečy:

• Pieter Nadaš. Kaniec adnaho siamiejnaha ramana (raman);

• Rudolf Słobada. Rozum (raman);

• Tadevuš Ruževič. Biez (vybranaja paezija);

• Andžej Stasiuk. Na šlachu ŭ Babadah (padarožnaja eseistyka);

• Daminik Tatarka. Kultura jak stasunki (vybranyja ese).

U prezientacyi biaruć udzieł pierakładčyki Aleś Karciel, Śviatłana Bohuš, Maryna Kazłoŭskaja, Maryja Puškina, a taksama słavacki paet i vydaviec Pieter Miłčak. Viadoŭca imprezy — Andrej Chadanovič. Uryŭki z tvoraŭ pračytajuć Hanna Chitryk i Pavieł Charłančuk. Halereja «Ŭ». Pačatak, a 19-j.

15 sakavika (piatnica). Fiłasofskaja sustreča «Naš viasioły apakalipsis». Fiłasofija dla nas pačynajecca niedzie ŭ Hrecyi i dalej pasialajecca dzieści ŭ Hiermanii i Francyi, ale zusim nie ŭ našych najbližejšych susiedziaŭ. Knihi sieryi «Siaredniejeŭrapiejskaje myśleńnie» imknucca pieraadoleć hety stereatyp.

Knihi, jakija buduć prezientavacca na sustrečy:

• Lešak Kałakoŭski. Naš viasioły apakalipsis (zbornik ese);

• Iržy Pržybań. Dysidenty prava: pra «aksamitnyja revalucyi» 1989 hoda, sposaby lehitymacyi, fikcyi lehalnaści i sučasnuju viersiju hramadskaje damovy (manahrafija);

• Juzef Tyšner. Myśleńnie pavodle kaštoŭnaściaŭ (manahrafija).

Čakajecca taksama pryjezd i aŭtohraf-siesija adnaho z aŭtaraŭ — češska-brytanskaha tearetyka prava, fiłosafa, prafiesara Iržy Pržybania. Siarod vystupoŭcaŭ — pierakładčyki i fiłosafy Alaksiej Łastoŭski, Taćciana Urubleŭskaja, Pavieł Barkoŭski, Valancin Akudovič, Lilija Iljušyna. Viadoŭca imprezy — Ihar Babkoŭ. Halereja «Ŭ». Pačatak, a 19-j.

20 sakavika (sierada). Sacyjałahična-palitałahičnaja sustreča «Paŭstańnie Jeŭropy». Dla Biełarusi temy histaryčnaha farmavańnia nacyi, admietnaści šlachoŭ paŭstavańnia vialikich i małych etnasaŭ, pakručastaści losaŭ tych narodaŭ, što histaryčna pražyvali na ziemlach ad bierahoŭ Dunaja da bierahoŭ Dniapra, vielmi blizkija i nadzvyčaj cikavyja.

Knihi, jakija buduć prezientavacca na sustrečy:

• Ištvan Bibo. Pra harotnaść małych uschodniejeŭrapiejskich dziaržavaŭ (navukova-palemičnaja praca);

• Andžej Valicki. Nacyja, nacyjanalizm, patryjatyzm (zbornik navukovych artykułaŭ).

Siarod vystupoŭcaŭ — pierakładčyki i redaktary, sacyjołahi i palitołahi: Andrej Chrapavicki, Anatol Sidarevič, Hienadź Sahanovič, Andrej Kazakievič, Ihar Babkoŭ, Alaksiej Dziermant. Viadoŭca imprezy — Alaksiej Łastoŭski. Halereja «Ŭ». Pačatak, a 19-j.

26 sakavika (aŭtorak). Litaraturnaja viečaryna «Pražskaja viasna ŭ Minsku». Prezientacyja tvoraŭ češskaj litaratury jak suśvietna viadomych kłasikaŭ, tak i sučasnych papularnych aŭtaraŭ u dychtoŭnych biełaruskich pierakładach:

• Bahumił Hrabał. Ja absłuhoŭvaŭ anhielskaha karala (raman);

• Ehan Bondy. Zaprašeńnie na viačeru (vybranyja tvory);

• Michał Viveh. Cudoŭnyja hady sabaku pad chvost (raman);

• Irena Doŭskava. Mocny Žbuć (raman).

U prezientacyi biaruć udzieł pierakładčyki i redaktary Vieranika Bialkovič, Hanna Jankuta, Lavon Barščeŭski, Viktar Žybul i virtualny Maks Ščur. Uryŭki z tvoraŭ pračytajuć Hanna Chitryk i Pavieł Charłančuk. Viadoŭca — kuratar sieryi «Češskaja kalekcyja» Siarhiej Smatryčenka. Halereja «Ŭ». Pačatak, a 19-j.

29 sakavika (piatnica). Miemuar-viečarynka. Žanr bieletryzavanych uspaminaŭ zasłužana maje vialikuju papularnaść u śviecie. Realnyja padziei čaściakom mohuć być bolš fantastyčnymi i nievierahodnymi za samuju vykštałconuju vydumku, asabliva kali viadziecca pra trahičnyja padziei jeŭrapiejskaj historyi XX stahodździa.

Na sustrečy buduć prezientavanyja nastupnyja knihi:

• Žo Łanhierava. Kaliści ŭ Bracisłavie. Majo žyćcio z Oskaram Ł.;

• Jan Rozner. Siem dzion da pachavańnia;

• Imre Kiertes. Stračany los;

• Šandar Maraj. Spoviedź mieščanina.

Udzieł voźmuć pierakładčyki Pavieł Raaha, Taćciana Abdułchakava, Śviatłana Rohač, Iryna Darafiejčuk. Uryŭki z tvoraŭ pračytajuć Hanna Chitryk i Pavieł Charłančuk. Viadoŭcy — Andrej Chadanovič i Siarhiej Smatryčenka. Halereja «Ŭ». Pačatak, a 19-j.

Kamientary da artykuła