U stalicy pačaŭsia fiestyval kłasičnaj muzyki «Minskaja viasna-2013»

9.04.2013 / 09:33

Cykł kancertaŭ «Minskaja viasna-2013» projdzie ŭ Biełaruskaj dziaržaŭnaj fiłarmonii z 9 krasavika pa 6 maja.

Sioleta muzyčny prajekt pryśviečany paŭviekavomu jubileju bujniejšaha ŭ krainie instrumienta — arhana Vialikaj zały fiłarmonii.

Śviatočnaja prahrama raźličana na piać viečaroŭ.

Adkryjecca forum hała-kancertam biełaruskich i rasijskich arhanistaŭ. Salist Biełaruskaj dziaržaŭnaj fiłarmonii Kanstancin Šaroŭ, narodny artyst Biełarusi Ihar Ałoŭnikaŭ, salistka kancertnaj zały «Połacki Safijski sabor» Ksienija Paharełaja, rasijskaja arhanistka, kampazitar i muzykaznaviec Maryja Voinava vykanajuć tvory Iahana Siebaśćiana Bacha, Hieorha Frydrycha Hiendela, Maksa Rehiera, Aleha Jančanki, Ihara Ałoŭnikava i Maryi Voinavaj. Ansambl «Kamiernyja salisty Minska» pad kiraŭnictvam dyryžora Dźmitryja Zubava pry ŭdziele niamieckaha arhanista Marcina Cimana i ŭładalnika ŭnikalnaha hołasu, kontrtenara i skrypača Dźmitryja Sińkoŭskaha 13 krasavika pradstaviać publicy kancerty I.S.Bacha i A.Vivaldzi.

Niamiecki arhanist, prafiesar Iahanies Hiefiert vystupić u Minsku solna 17 krasavika.

U jaho prahramie — muzyka I.S.Bacha, N.Brunsa, Šarla-KamilaSien-Sansa, Fieliksa Miendelsona-Bartoldzi i Łui Vjerna.

Upieršyniu fiłarmonija addaść 23 krasavika ceły kancert vypusknikam i studentam akademii muzyki.

Vystupiać arhanisty Valancina Bandarenka, Volha Taborka, Kalinika Miadźviedzieva, Volha Padhajskaja, Kaciaryna Nikałajeva i ich piedahoh Uładzimir Nieŭdach (arhanist Archikafiedralnaha kaścioła imia Najśviaciejšaj Panny Maryi). Jany vykanajuć tvory Iahana Siebaśćiana Bacha, kampazitaraŭ-ramantykaŭ i biełaruskuju muzyku XXI stanohodździa.

Zavieršycca fiestyval 6 maja kancertam u Suśvietny dzień arhana.

Finalnaje vystupleńnie budzie pryśviečana 850-hodździu słavutaha Sabora Paryžskaj Božaj Maci Notre Dame de Paris. Bujniejšy pradstaŭnik sučasnaj arhannaj škoły zasłužany artyst Rasii Alaksandr Fisiejski vystupić z novaj prahramaj «Francuzski simfaničny arhan».

Arhanizoŭvajučy forum, Biełdziaržfiłarmonija stavić ekśpierymient. Zvyčajna ŭ miesiac dajuć adzin taki kancert. Śviatkavańnie ž jubileju raźličana na piać viečaroŭ. Cykł kancertaŭ «Minskaja viasna-2013» projdzie pry padtrymcy Ministerstva kultury Biełarusi.

Čytajcie taksama:

Kamientary da artykuła