«Śmierć pacyjentki K.»: vyniki słužbovaha rasśledavańnia — dakumienty

«Naša Niva» zdabyła kopii rašeńnia Lačebna-kantrolnaj rady Ministerstva achovy zdaroŭja «Ab praviadzieńni słužbovaha rasśledavańnia śmierci pacyjentki K.»

Mienavita na asnovie hetaha dakumienta Śledčy kamitet pryniaŭ rašeńnie ab zatrymańni niekalkich supracoŭnikaŭ centra «Ekamiedservis». Śledstva maje vyśvietlić, nakolki vysnovy, zroblenyja Ministerstvam achovy zdaroŭja, spraviadlivyja. Varta adznačyć, što ŭ rašeńni Ministerstva havorycca ab vinie aniestezijołaha, miž tym Śledčy kamitet pastanaviŭ aryštavać nie tolki jaho, ale i miedsiastru, jakaja jamu dapamahała, i samu dyrektarku centra — a ŭ minułym načalnicu adnaho z upraŭleńniaŭ taho samaha ministerstva Halinu Vałžankinu.

«Aniestezijałohija pacyjentcy K. pravodziłasia na technična niaspraŭnym aparacie», — robić vysnovu kamisija Ministerstva achovy zdaroŭja na čale ź pieršym namieśnikam ministra Pinievičam.

Arhanizacyju mieddapamoh pacyjentcy K. u «Ekamiedservisie» pryznali nie adpaviednaj narmatyŭnym dakumientam.

Adnačasova publikujem inšy dakumient: vyniki pravierki dziejnaści aniestezijałahičnych słužbaŭ u roznych miedcentrach.

Ministerstva prypyniła dziejnaść licenzij centram, u jakich «praviadzieńnie apieracyj va ŭmovach ahulnaj aniestezii źjaŭlajecca niebiaśpiečnym dla pacyjenta». Takimi byli pryznanyja nie tolki «Ekamiedservis», ale i «Hrandmiedyka», «Miedekśpiert», «Dziela zdaroŭja», «Valere», «Miedart», «TransEnierhaOjł».

Jość i šerah miedycynskich centraŭ, u jakich Ministerstva licenzii nie zabrała, ale zabaraniła praviadzieńnie aniestezii da vypraŭleńnia chibaŭ. Heta «Antes Mied», «Bieleŭramied-Uzdym», «KMKMIED», «Edaran-miedykał», «Tera Miedyka», «Kanfidens-Servis», «Miedrekpłast».

Z poŭnym tekstam dakumientaŭ Ministerstva achovy zdaroŭja možna paznajomicca vyšej.

Abvinavačvańni traim miedykam «Ekamiedservisa», da jakich užyta miera strymańnia ŭ vyhladzie zaklučeńnia pad vartu, pakul ź ich nie vystaŭlenyja, jany praciahvajuć zastavacca padazravanymi, paviedamili ŭ Śledčym kamitecie ŭ aŭtorak.

Hałoŭny inžynier miedycynskaha centra byŭ taksama zatrymany 6 maja pa padazreńni ŭ ździajśnieńni złačynstva, kvalifikavanaha jak słužbovaja chałatnaść, i źmieščany ŭ izalatar časovaha ŭtrymańnia.

Stvorana śledčaja hrupa ŭ składzie dziesiaci śledčych. Śledčyja dziejańni pravodziacca z udziełam śpiecyjalistaŭ Ministerstva achovy zdaroŭja pa dvuch kirunkach: aniestezijałohija i chirurhija.

U kancy sakavika ŭ miedycynskim centry była zroblena apieracyja pa rynapłastycy 25-hadovaj žycharcy Hrodna Julii Kubaravaj.

Kamientary da artykuła