Na Arłova i Hierasimoviča padajuć u sud za fotazdymki

Aŭtary knihi «Spadčyna Biełarusi» — žurnalist BT Aleh Łukaševič i jahony kaleha Alaksandr Alaksiejeŭ — padajuć u sud na aŭtaraŭ inšaha znakavaha vydańnia — ilustravanaha toma «Kraina Biełaruś». Teksty ŭ im naležać piśmieńniku Arłovu, a fotašerah — ilustrataru Hierasimoviču. U knizie znajšłosia 22 foty z vydańnia «Spadčyna Biełarusi» biez ukazańnia aŭtarstva.

Pra heta Łukaševič paviedamiŭ u liście, nakiravanym u «Našu Nivu»:

«My ź cikavaściu vyrašyli paznajomicca z novym vydańniem tandema Arłoŭ-Hierasimovič. Adnak asałoda ad knihi prajšła, kali adzin za druhim my pačali paznavać svaje fotazdymki pomnikaŭ architektury i pradmietaŭ dekaratyŭna-prykładnoha mastactva. Ich było nie adzin, nie dva, navat nie piać, a 22 adzinki. Cikava, što pad niekatorymi NAŠYMI fotazdymkami źmiaščaŭsia podpis: fotazdymak Źmitra Hierasimoviča albo prosta „sučasnaje fota“. My nie mahli pavieryć svaim vačam u takoje nachabstva. Ni spadar Uładzimir Arłoŭ, ni spadar Źmicier Hierasimovič nie źviartalisia da nas z prośbaj ab pradastaŭleńni zdymkaŭ. Ich prosta skrali z našaha alboma i vydali za svaju vialikuju pracu. Ci viedajuć spadary, što kožny zdymak naohuł maje svajho aŭtara? Što heta aŭtarski tvor? Takim čynam skradzienyja zdymki nadrukavany u 5000 ekziemplarach. Kali b padobnaja situacyja skłałasia, naprykład, u Francyi, uvieś tyraž byŭ by aryštavany.

Heta nie pieršy vypadak, kali našyja zdymki nachabna kraduć. My ŭžo vyjhrali niekalki padobnych spraŭ u sudzie. I dalej budziem achoŭvać toje, što naležyć nam.

Zaraz naš juryst rychtuje zajavu ŭ Viarchoŭny sud Respubliki Biełaruś».

Ilustratar alboma «Kraina Biełaruś» Źmicier Hierasimovič kaža, što braŭ fotazdymki ŭ vydaviectvie «Biełaruś».

Anałahičnaja situacyja zdarałasia i z fotazdymkami Hieorhija Lichtaroviča, kaža Hierasimovič. Tam usio vyrašyłasia paśla telefonnaj razmovy. Było vyrašana, što ŭ nastupnych vydańniach aŭtarstva budzie ŭdakładniena. Uładzimir Arłoŭ pakul ničoha nie moža skazać pra hetaje niepryjemnaje stanovišča.

Kniha «Kraina Biełaruś» — cudoŭnaje vydańnie ŭ dobraj palihrafii, jakoje apaviadaje pra historyju našaj krainy.

Kamientary da artykuła