Aŭtar Vikiliks pakajaŭsia pierad sudom, advakaty nazyvajuć źmiakčajučaj akaličnaściu jahony homaseksualizm

Bredli Meninh pieraprasiŭ za toje, što svaimi dziejańniami nanios škodu Złučanym Štatam.

Bredli Meninh, infarmatar partała WikiLeaks, jaki pieradaŭ u ŚMI sotni sakretrnych dakumientaŭ, u svaim apošnim słovie ŭ sudzie prynios prabačeńni za svoj učynak. «Mnie prykra, što svaimi dziejańniami ja nanios škodu Złučanym Štatam», — zajaviŭ Meninh u vajskovym sudzie ŭ Fort-Midzie pad Vašynhtonam. Jon taksama zajaviŭ, što nie chacieŭ naškodzić ludziam svaimi dziejańniami. I skazaŭ, što hatovy panieści pakarańnie za svaje ŭčynki.

25-hadovy Meninh pracavaŭ analitykam vajskovaj vyviedki. Na hetaj pasadzie jon mieŭ dostup da sakretnych depiešaŭ Pientahona i dypłamataŭ.

Śledstva pa spravie viałosia try hady. Urešcie, z Meninha źniali abvinavačańnie ŭ dapamozie voraham dziaržavy, ale pryznali vinavatym u špijanažy, vydačy dziaržaŭnych sakretaŭ, kampjutarnym machlarstvie i kradziažy.

Advakat Meninha ŭpiraje na toje, što chłopiec baluča pieražyvaŭ prablemy, źviazanyja sa svajoj seksualnaj aryjentacyjaj — Meninh homaseksualist. I što hetyja pieražyvańni vyklikali ŭ jaho kryzis i žadańnie inšaj samarealizacyi. Advakat spadziajecca, što sud prymie heta ŭ jakaści źmiakčajučaj akaličnaści.

Meninhu pahražaje da 90 hadoŭ turemnaha źniavoleńnia.

Kamientary da artykuła