Sud aštrafavaŭ dyrektara ŽESa za admovu adkazać na zvarot pa-biełarusku

Sud Frunzienskaha rajona Minska 3 vieraśnia aštrafavaŭ dyrektara minskaha ŽES-48 za admovu adkazać na zvarot pa-biełarusku.

Jak paviedamiŭ BiełaPAN błohier Hleb Łabadzienka, jaki ŭdzielničaŭ u sudovym pracesie ŭ jakaści paciarpiełaha, historyja pačałasia sa skarhi jaho susieda ŭ ŽES, što nibyta Łabadzienka niezakonna robić u svajoj kvatery pierapłaniroŭku. Pa słovach Łabadzienki, ŽES vynies jamu papiaredžańnie, navat nie pryjšoŭšy z pravierkaj.

«Mianie heta aburyła, i ja napisaŭ im pratest, — raspavioŭ Łabadzienka. — Napisaŭ ja pa-biełarusku i paprasiŭ, kab u adpaviednaści z zakonam ab zvarotach hramadzian mnie dali adkaz na movie zvarotu, heta značyć pa-biełarusku. U adkazie, jaki ja atrymaŭ i jaki byŭ napisany pa-rusku, u kancy było napisana, što pavodle Kanstytucyi ŭ nas dźvie dziaržaŭnyja movy. Takim čynam, jany parušyli zakon ab paradku zvarotu hramadzian».

Łabadzienka padaŭ skarhu ŭ Hienieralnuju prakuraturu. «Z Hienprakuratury skarhu pierasłali ŭ prakuraturu Frunzienskaha rajona, a tam daručyli raźbiracca administracyi Frunzienskaha rajona. Jany ŭžo i nakiravali spravu ŭ sud», — raspavioŭ Łabadzienka.

3 vieraśnia adbyŭsia sud, na jaki z boku ŽESa nichto nie źjaviŭsia. «Jany dasłali faks, što prosiać razhledzieć spravu ŭ ich adsutnaść, — skazaŭ Łabadzienka. — Sudździa skazała, što ŭ jaje nijakich dadatkovych źviestak niama, i vyniesła prysud — štraf dyrektaru ŽESa u piać bazavych vieličyniaŭ (500 tysiač rubloŭ)».

Prysud jašče nie ŭstupiŭ u zakonnuju siłu, i ŭ ŽESa jość 10 dzion na jaho abskardžańnie. «Ale, jak ja zrazumieŭ, abskardžvać jany jaho nie źbirajucca», — adznačyŭ Łabadzienka.

Atrymać apieratyŭny kamientar u dyrektara ŽES-48 BiełaPAN nie ŭdałosia.

Kamientary da artykuła