Konkurs biełaruskich tancaŭ «Miacielica» — jašče možna padać zajaŭku!
Škoła tradycyjnaha mastactva i «Budźma!» zaprašajuć.
Konkurs biełaruskich tancaŭ «Miacielica» adbudziecca ŭ minskim Pałacy mastactvaŭ (Kazłova, 3) 14 śniežnia. Konkurs arhanizujuć Škoła Tradycyjnaha Mastactva i hramadskaja kulturnickaja kampanii «Budźma biełarusami!». Śviatočnaja padzieja pradstavić usim zacikaŭlenym mahčymaści i placoŭku dla ŭdaskanalvańnia majsterstva i dla dobrych siabroŭskich stasunkaŭ, abmienu dośviedam i infarmacyjaj.
Konkursy tancaŭ, balnych, irłandskich dy inšych — mahutny stymuł dla raźvićcia tancavalnaj kultury, uzdymu papularnaści tych ci inšych nakirunkaŭ tancu i navat mody na hetkaje baŭleńnie času. Vykanaŭcy narodnych tancaŭ hadujucca i hartujucca ŭ nas pa-roznamu — chtości ź dziacinstva tańčyŭ u ansambli, niechta chadziŭ «na karčy» i ŭ «Žar-ptušku», chtości rehularna naviedvaje adpaviednyja viečaryny i kłuby, a chtości litaralna niekalki razoŭ trapiŭ na majstar-kłas i ŭžo nie ŭjaŭlaje ŭłasnaha žyćcia bieź viasiołych skokaŭ. Mnohija ŭ hetym dasiahnuli majsterstva, stvaryli svoj indyvidualny styl i estetyku tanca, majuć vydatny nacyjanalny stroj. Ale konkurs daje mahčymaść pasprabavać svaje siły nie tolki karyfiejam, ale i pačatkoŭcam.
Aŭtar idei konkursa — Mikałaj Kozienka — znakamity etnachareohraf, niastomny daśledčyk aŭtentyčnaha biełaruskaha tanca, jaki ŭžo šmatrazova vystupaŭ u jakaści inicyjatara, režysiora-pastanoŭščyka i baletmajstra šerahu znakavych falkłornych fiestyvalaŭ.
Sioletni konkurs maje daśviedčanaje i aŭtarytetnaje žury: Viačasłaŭ Kałacej— zahadčyk kafiedry etnałohii i falkłoru BDUKIM, dacent, kandydat kulturałohii, Taćciana Kucharonak — staršy navukovy supracoŭnik adździeła narodaznaŭstva Centra daśledvańniaŭ biełaruskaj kultury, movy i litaratury NAN RB, Alaksandr Łoś — viadomy daśledčyk tradycyjnaj muzyki i tancu, mastak, muzyka, Luboŭ Sivurava — dacent kafiedry mieniedžmientu sacyjalna-kulturnaj dziejnaści BDUKIM, Siarhiej Vyskvarka — zahadčyk arhanizacyjna-tvorčaha adździeła Lubanskaha rajonnaha Centra kultury, kiraŭnik uzornaha falkłornaha ansambla «Vierabiejki», arhanizatar letniaj tancavalnaj škoły «Piatrovica» i fiestyvalu «Piatroŭski fest»2012, 2013».
Adkryćcio i prahrama konkursa buduć supravadžacca tradycyjnymi śpievami i muzykaj vydatnych instrumienalnych kapeł: «Na taku», «Dźvina», taksama na konkursie zajhraje Vasil Siemaškievič — vydatny muzyka ź Lubani. Miž inšym, u prahramie — majstar-kłas pa tancu «Miacielica» dla hledačoŭ i udzielnikaŭ konkursa.
Da ŭdziełu zaprašajucca tancavalnyja pary, jakija z zadavalnieńniem zajmajucca tradycyjnymi biełaruskimi tancami i nie źjaŭlajucca prafiesijanałami. Uzrost udzielnikaŭ — ad 16 hod.
U prahramie konkursa — 10 najbolš viadomych biełaruskich tancaŭ, a mienavita: lavonicha, padyspań, krakaviak, polka-kakietka, polka impravizavanaja, nočka, kachanačka, karapiet, va sadu li, barynia.
Uvachod na konkurs volny. Pačatak — 10.30, zaviaršeńnie — 16.30. Ankiety-zajaŭki tancoraŭ dla ŭdziełu ŭ konkursie prymajucca da 30 listapada 2013 hoda ŭ elektronnym abo papiarovym vyhladzie pa adrasie: Kaciaryna Šejka, kat-shejko@yandex.ru, 220100, h. Minsk, vuł. Bahdanoviča, d. 72, kv. 52
Spampavać błank ankiety-zajaŭki, a taksama aznajomicca z Pałažeńniem ab konkursie i mahčymaściami padrychtoŭki da spabornictva možna na sajcie Škoły tradycyjnaha mastactva ci ŭ supołcy Ukantakcie.