Rasijskija śpiecsłužby apublikavali zapis telefonnaj razmovy amierykanskich dypłamataŭ, u jakoj tyja razvažajuć, što rabić va Ukrainie
U internecie źjaviŭsia zapis telefonnaj razmovy pamočnicy dziaržsakratara ZŠA Viktoryi Nułand i pasła ZŠA va Ukrainie Džefry Pajeta. U časie razmovy žančyna charaktaryzuje niepavarotlivaść i pasiŭnaść Jeŭrasajuza ŭ pytańni Ukrainy niecenzurnym słovam.
Akramia taho, surazmoŭcy abmiarkoŭvajuć, jak Amieryka pavinna budavać adnosiny z tryma lidarami ŭkrainskaj apazicyi. Nułand vysoka aceńvaje kiraŭničy patencyjał Jacaniuka i vykazvaje mierkavańnie, što Kličko budzie nie schilny pracavać u kamandzie Jacaniuka.
Taksama amierykanskija dypłamaty razvažajuć ab šlachach vychadu z palityčnaha kryzisu va Ukrainie. Jany havorać ab nieabchodnaści pryciahnuć kiraŭnikoŭ ZŠA i AAN da razrulvańnia situacyi. Akramia taho, jany niehatyŭna adhukajucca pra nierašučaść Jeŭrasajuza adnosna Ukrainy. Viktoryja Nułand dazvoliła sabie mocnaje słova nakont hetaha.
Zapis byŭ vykładzieny na servisie YouTube i zabiaśpiečany citrami z rasiejskim pierakładam. Akramia razmovy Nułand i Pajeta pa-anhielsku, u tym ža zapisie źmieščana razmova pasłańnika Jeŭrasajuza va Ukrainie Jana Tambinskaha i vysokapastaŭlenaj supracoŭnicy dypłamatyčnaj słužby Brusela Chielhi Šmid.
Vyhladaje, što razmova adbyłasia ŭ apošnija dni studzienia, kali Viktar Janukovič prapanavaŭ Jacaniuku stać premjeram, a aŭtamajdanaviec Bułataŭ jašče zastavaŭsia ŭ rukach vykradalnikaŭ.
Pamočnica dziaržsakratara ZŠA pryznała sapraŭdnaść razmovy i vybačyłasia pierad kiraŭnictvam Jeŭrasajuza. Jak paviedamlaje ahienctva Frans pres, pradstaŭnica dziarždepartamienta Džen Psaki vykazała mierkavańnie: źjaŭleńnie zapisu — sprava ruk rasiejskaj vyviedki.