Pucin prosić sieparatystaŭ pieranieści refierendum
Pachavańnie troch zabitych bajevikoŭ i adnaho mirnaha žychara ŭ Słaviansku, 7 maja.
Rasija prosić sieparatystaŭ va Ukrainie pieranieści refierendum z 11 maja na bolš poźni termin, kab «stvaryć dla jaho ŭmovy».
Pra heta zajaviŭ prezident RF Uładzimir Pucin paśla sustrečy z kiraŭnikom ABSIE, prezidentam Šviejcaryi Dydje Burkchaltaram.
U toj ža čas, RIA Naviny paviedamlaje, što Pucin prosić ab pieranosie refierendumu, kab stvaryć umovy dla dyjałohu, a nie pra admienu refierendumu.
«Zaklikajem pradstaŭnikoŭ paŭdniovaha ŭschodu Ukrainy, prychilnikaŭ fiederalizacyi krainy pieranieści namiečany na 11 maja refierendum. Z tym, kab stvaryć nieabchodnyja ŭmovy dla hetaha dyjałohu», — skazaŭ Pucin.
Nahadajem, što ideju refierendumu nie padtrymali ani Daniecki, ani Łuhanski abłasnyja saviety. Hubiernatary abłaściej, mery Daniecka i Łuhanska, viadomyja hramadskija dziejačy rehijona, šachciory — nichto ź ich nie padpisaŭsia za refierendum. I heta niahledziačy na zachop uzbrojenymi dyviersijnymi hrupami mnohich administratyŭnych budynkaŭ i abjektaŭ infrastruktury ŭ rehijonie, što, na dumku tych, chto stajaŭ za hetym, pavinna było vyklikać strach va ŭkrainskich aktyvistaŭ, pryvieści da kałapsu ŭłady i paŭtoru krymskaha scenara.
Hramadskaja dumka padzialiłasia napałam. Abłasnyja centry i vioska pieravažna padtrymlivajuć adzinstva Ukrainy. U małych haradach bolšaja padtrymka abjadnańnia z Rasijaj. Adzinstva Ukrainy adstojvajuć biznesoŭcy i intelihiencyja, a taksama studenty. U toj ža čas u mnohich haradach sieparatysty majuć realnuju padtrymku miascovaha nasielnictva.
Cikava, što napiaredadni Słužba biaśpieki Ukrainy apryludniła zapis razmovy kiraŭnika nieanacysckaha ruchu «Ruskaje adzinstva» Barkašova (horad Maskva) ź lidaram niezarehistravanaj arhanizacyi «Pravasłaŭny Danbas» Bajcovym (Danieck). Apošni taksama adzin ź lidaraŭ tak zvanaj «Danieckaj respubliki». Jon narakaje, što pravieści refierendum im nie ŭdasca, bo jany nie kantralujuć situacyi i ŭkrainskija vojski dziejničajuć paśpiachova. U svaju čarhu, Barkašoŭ raić napisać vyniki hałasavańnia ad bałdy, ale kab było praŭdapadobna, «nie 100%, a 90».
Jak viadoma, siońnia ŭnačy ŭkrainskija siłaviki vyzvalili ad sieparatystaŭ administratyŭnyja budynki ŭ Maryupali. Pazaŭčora jany nanieśli parazu dyviersijnym hrupam u Słaviansku.
Aściarožna, nienarmatyŭnaja leksika: