Kijeŭ surjozna rychtujecca da abarony FOTY
Ale pry hetym zachoŭvaje svoj viasioły i lohki duch.
Hetaje fota zroblena na Uładzimirskaj vulicy Kijeva la Załatych Varotaŭ a 23-j hadzinie. Niedzie prykładna ŭ hetym miescy ŭ 1240 hodzie ŭ horad uvarvalisia pieradavyja sotni Batu-chana. Ciapier ža moładź ihraje tut na fartepijana, siedziačy na splecienych z łazy łaŭkach. Ludzi spyniajucca pasłuchać.
U banderaŭcaŭ uvohule niejki bzik z hetymi fartepijanami. Instrumienty stajać pa ŭsim Kijevie. Toje, na jakim ihrali na Majdanie, dahetul vykarystoŭvajecca pierad budynkam haradskoj rady.
Voś tabie i vajna, i padrychtoŭka da jaje.
Na budynku Ministerstva zamiežnych spravaŭ pa-raniejšamu visiać ściahi Ukrainy i Jeŭrasajuza.
Kala dziaržaŭnych budynkaŭ nie vidać ni jakaj asablivaj achovy. Siadzić u budančyku adzin sałdat, i ŭsio. Milicyi ŭvohule mała vidać.
U subotu hitaryst i kabzar śpiavali pad ministerstvam narodnyja pieśni, źbirali hrošy. Mianie pryvioŭ tudy Viktar Marcinovič pasłuchać. Skazaŭ, što nikoli nie čuŭ, kab na vulicy śpiavali takim opiernym hołasam. Pobač hulali siemji ŭ vyšyvankach.
U Kijevie narod masava nosić vyšyvanki.
Hieorhijeŭskaj stužki ja nie sustreŭ nivodnaj, nidzie.
Horad zaviešany nacyjanalnymi ściahami.
Chto nie ŭkrainiec, toj vyviešvaje na mašynie dva ściahi: naprykład, biełaruski i ŭkrainski, azierbajdžanski i ŭkrainski.
PTN — heta skarot ad Pucin, a PNCH — taksama skarot. Takija nalepki sustrenieš na mašynach. A majki z takim nadpisam — atrybut usich suvienirnych razvałaŭ.
Pucina pasyłajuć. Kijeŭ Pucin straciŭ nazaŭždy.
U piatnicu ŭ fiestyval-restaracyi «Dyvan» Andrej Chadanovič pastaviŭ na vušy 400 čałaviek publiki. 19 maja tamsama vystupaje biełaruski hurt «Vuraj».
Achłabyścin z ekrana moža nieści ŭsiakuju łuchcień, a sam jedzie ŭ kubło banderaŭcaŭ z kancertam.
Kijeŭ nahadvaje vialiki karnavał.
Pry hetym za košt devalvacyi hryŭni tam ciapier usio zusim tannaje. Miasnoje, syry ŭ kramach kaštujuć udvaja tańniej, čym u Minsku. Tanna zdajucca i kvatery, pakoi, bo turystaŭ mała i kryzis abmiežavaŭ ekanamičnuju aktyŭnaść. Pašyć harnitur u atelje dzieści ŭ centry možna praktyčna za kapiejki. Ludzi chapajucca za lubuju pracu.
U kramcy «Biełaruskija pradukty» na Padole ź biełaruskaha ciapier tolki sasiski «Biełaruskija» vyrabu Roŭnienskaha miasakambinata. Sapraŭdnyja biełaruskija pradukty zadarahija ciapier.
Voś tak vyhladaje Ukraina za try dni da vybaraŭ, jakija Rasija choča lubym koštam sarvać. Terakty, rasstreły, zabojstvy — čornyja naviny hetaha majskaha tydnia.
Pad prysadami na vulicy Instytuckaj, arenie samaha kryvavaha boju hetaj revalucyi, jašče možna znajści niavykarystanyja kaktejli Mołatava i butli ź bienzinam. Tak niby ekspanaty žyvoha muzieja rassypany pa horadzie.
Ničoha hetaha ŭ Kijevie nie zaŭvažna, kali ty nie hladziš televizar i nie ŭsłuchoŭvaješsia ŭ razmovy ludziej.
Na tratuarach sustrakajucca impravizavanyja miemaryjały pamiaci hierojaŭ revalucyi.
Tolki na treci viečar pierabyvańnia ŭ Kijevie ja sustreŭ ludziej u kamuflažy ŭ maskach. Jany stajali vakoł aŭtobusa na Michajłaŭskaj płoščy. Voś jak u nas na placoŭcy kala Akademii navuk źbirajucca turysty ŭ aŭtobus dla pajezdki kudyści ŭ Vilniu, u «Akropalis», tak tut stajaŭ aŭtobus, jaki adpraŭlaŭsia na vajnu.
Padjazdžajuć aŭtamabili, ź ich vyłaziać chłopcy ŭ novym kamuflažy. Chtości ŭ čornych bałakłavach, chtości biez. Zahružajuć rukzaki ŭ bahažnaje adździaleńnie i siadajuć u sałon. Dobraachvotniki, jakija jeduć na vachtu.
Jany paprasili nie zdymać ich i nie raspytvać. Ja i nie zdymaŭ. Raz jany chavajuć tvary, značyć, jość pryčyny. Z-pad bałakłavaŭ hladziać vočy. Chłopcam hadoŭ pa 18—22. Nie hopniki — studenty. Jany jeduć ad fartepijanaŭ na front. Jak jechali ich papiaredniki, studenty ŭ 1918-m, na boj suprać balšavikoŭ. Tolki ciapier ich bolš, i za imi dziaržava, abkradzienaja, słabaja, ale dziaržava. I padtrymka ŭsiaho Volnaha Śvietu, jakoj nie było ŭ 1918-m.
Ciapier jon niedzie na froncie.