Kursy «Kuł Skuł»: My nie pazicyjanujem biełaruskuju movu ŭ jakaści zamiežnaj, a chočam, kab našyja dzieci viedali jaje
Alena Łukaševič źviarnułasia ŭ «Salidarnaść» paśla publikacyi fota nieadnaznačnaj rekłamy moŭnych kursaŭ.
16 vieraśnia kaardynatar moładzievaj sietki prafsajuzu REP Andrej Stryžak apublikavaŭ na svajoj staroncy ŭ Facebook fota ŭbačanaj im u Minsku rekłamy Centra moŭnaj padtrymki «Kuł Skuł».
U šapcy abviestki źmieščana prapanova vyvučać zamiežnyja movy ŭ centry «Kuł Skuł». Nižej padajecca infarmacyja pra kursy dla dziaciej, što ŭklučajuć vyvučeńnie anhlijskaj, šviedskaj i biełaruskaj movy.
Takoje spałučeńnie — prapanova vyvučać zamiežnyja movy, a siarod ich i biełaruskuju —vyklikała adpaviednuju reakcyju ŭ karystalnikaŭ sacsietak, pieravažna niehatyŭnuju.
Karespandent «Salidarnaści» patelefanavaŭ u «Kuł Skuł». U centry paabiacali pieradać infarmacyju kiraŭnictvu i vykazali mierkavańnie pra niekarektna aformlenuju abviestku.
U aŭtorak, 17 vieraśnia, fota rekłamy źjaviłasia na sajtach biełaruskich ŚMI.
Nieŭzabavie z karespandentam «Salidarnaści» źviazałasia supracoŭnica centra «Kuł Skuł» Alena Łukaševič. Jana raskazała pra kursy biełaruskaj movy, kab źniać pytańni vakoł ažyjatažu, vyklikanaha rekłamaj.
«My nie pazicyjanujem biełaruskuju movu ŭ jakaści zamiežnaj. Zaŭvažu, što my źjaŭlajemsia centram moŭnaj padtrymki, a nie škołaj zamiežnych moŭ.
Kursy na rodnaj movie my arhanizavali pa ŭłasnaj inicyjatyvie. Heta stratna dla nas, ale heta pryncypovy momant.
My chočam, kab našyja dzieci viedali biełaruskuju movu, bo z hetym u Biełarusi vielmi składana», — patłumačyła Alena Łukaševič.
Pa jaje słovach, kursy pačali dziejničać tolki 15 vieraśnia, rekłama źjaviłasia ŭ vieraśni. Pakul što zaniatki pa biełaruskaj movie nie karystajucca papularnaściu.
«Mnohija baćki nas nie razumiejuć, ale my ŭsio adno prapanujem biełaruskuju movu. Heta naša kultura, my musim viedać rodnuju movu. Pakul što situacyja takaja: hrupy pa anhlijskaj movie zapoŭnienyja całkam, a ŭ biełaruskamoŭnych zajmajecca pa 2-3 dzietak».
Alena Łukaševič raskazała, što ŭ biełaruskamoŭnych hrupach viadziecca padrychtoŭka da pastupleńnia z pačatkovaj škoły ŭ himnaziju. A niekatoryja baćki zapisvajuć dziaciej ź cikavaści.
«Zaniatki pravodziacca ŭ hulniavoj formie. My raskazvajem dzieciam biełaruskija kazki, vyvučajem hieahrafiju na rodnaj movie, arhanizujem hulni. U mianie troje dzietak, dačka niadaŭna pryznałasia, što na biełaruskamoŭnych zaniatkach joj našmat cikaviej, čym na kursach anhlijskaj movy».
Pa słovach supracoŭnicy centra, da pošuku vykładčyka biełaruskaj movy jany padyšli surjozna:
«My adbirali ź vialikaj kolkaści kandydataŭ. Byli navat navukovyja supracoŭniki, ale nie ŭsie ŭmiejuć pracavać ź dziećmi. Ja kožnamu kandydatu kazała, što naš vykładčyk musić nie tolki razmaŭlać pa-biełarusku, ale dumać, i navat sny śnić pa-biełarusku. Na sumoŭje ja brała svaich dzietak — dziaŭčynak 10 i 7 hadoŭ. I ŭ časie adnoj z hutarak z čarhovym kandydatam adna z skazała: «Oho, jak cikava!» Tak my i znajšli svajho vykładčyka».
Na pytańnie, što budzie z našumiełaj rekłamaj, supracoŭnica centra patłumačyła nastupnaje. Damova ź minskim mietrapalitenam zaklučana na dva tydni, hetyja abviestki zastanucca ŭ raniejšym vyhladzie. U dadzieny momant idzie praca nad stvareńniem sajta centra. Na im budzie raźmieščana ŭsia infarmacyja.
Alena Łukaševič zaklikaje ŭsich žadajučych zapisvać svaich dziaciej na zaniatki pa biełaruskaj movie. Jany prachodziać pa adrasie: Minsk, vulica Marjeŭskaja, 7a (kala kinateatra «Mir»).
Teł.: +375 44 500 88 21 (vel).