Zaŭtra ŭ Minsku — čarhovaja sustreča kantaktnaj hrupy pa Ukrainie
abnoŭlena
19 vieraśnia ŭ Minsku płanujecca čarhovaje pasiadžeńnie kantaktnaj hrupy pa ŭrehulavańni situacyi va Ukrainie, paviedamiŭ siońnia na bryfinhu ŭ Dnieprapiatroŭsku eks-prezident Ukrainy, pradstaŭnik hetaj kantaktnaj hrupy Leanid Kučma.
«Ja zaŭtra znoŭ vylataju ŭ Minsk razam z hrupaj ABSIE», — cytuje Kučmu ahienctva UNIAN. Pavodle jaho słoŭ, «buduć nialohkija pieramovy, płanujecca pryniać dakumient, što treba rabić u zabieśpiačeńnie raniej pryniataha pratakoła» (papiaredniaha pratakoła da pahadnieńnia ab spynieńni ahniu na Danbasie, padpisanaha ŭ Minsku 5 vieraśnia).
Na dalejšych pieramovach pa ŭrehulavańni situacyi «my nie pavinny pastupacca terytaryjalnaj cełasnaściu Ukrainy», skazaŭ Kučma. «Ja viedaju vyraznuju pazicyju prezidenta Ukrainy pa hetym pytańni — heta «śviaščennaja karova». My nie pryznajem fiederalizacyi i respublik», — padkreśliŭ jon.
Pavodle słoŭ Kučmy, dakumient kantaktnaj hrupy z 12 punktaŭ, padrychtavany raniej, u pieršuju čarhu pryznačany dla ŭkrainskaj ułady. Razam z tym sprava ŭład, u tym liku i rasijskich, jak prymianiać hetyja punkty. «Mała chto źviarnuŭ uvahu, u tym liku i ŭ Viarchoŭnaj radzie, što ŭ adnym z punktaŭ dakumienta ABSIE vyrazna zapisana — kantrol nad ukrainska-rasijskaj miažoj. Kali nie budzie kantrolu, a heta zadača ABSIE, ni pra jaki mir nielha havaryć. Kali miaža adkryta dla ruchu rasijskaj techniki i vajennaj siły, to dalejšyja pierśpiektyvy možna sabie tolki ŭjavić», — padkreśliŭ Kučma.
Jon ličyć, što kantaktnaja hrupa svaju zadaču vykanała, a ŭ jakim vyhladzie buduć prymać zakonaprajekty ab situacyi ŭ Danbasie, zaležyć ad Viarchoŭnaj rady. Pavodle mierkavańnia Kučmy, ciapier važnym źjaŭlajecca vyvad z Danbasa rasijskaj techniki i vajennych, abmien vajennapałonnymi i hetak dalej.
«U hetaj vajnie z Rasijaj my nie možam być pieramožcami, tamu što ŭkrainskaja armija vajuje zbrojaj uzoru XX stahodździ, a Rasija — technikaj XXI stahodździa. Śviedčańniem hetamu toje, što terarysty na Danbasie ŭzbrojeny technikaj, jakaja z adlehłaści za try kiłamietry rasstrelvaje ŭkrainskich bajcoŭ i prašyvaje braniu našych tankaŭ», — skazaŭ Kučma. Jon taksama dadaŭ, što praŭda pra kolkaść zahinułych u zonie ATA nieviadomaja.
U pres-słužbie MZS Biełarusi paćvierdzili, što 19 vieraśnia ŭ Minsku płanujecca sustreča kantaktnaj hrupy, adnak dakładny skład udzielnikaŭ, miesca i čas praviadzieńnia pakul nieviadomyja.
Kiraŭnik pres-centra samaabvieščanaj Łuhanskaj narodnaj respubliki Uładzimir Inaharodski zajaviŭ BiełaPAN, što pradstaŭniki ŁNR «abaviazkova pryjeduć na sustreču», ale pakul nieviadoma, chto mienavita.
Nahadajem, papiaredni raŭnd pieramoŭ kantaktnaj hrupy ŭ farmacie Ukraina — ABSIE — Rasija — sieparatysty Danbasa prajšoŭ u Minsku 5 vieraśnia. Na im byŭ pryniaty pratakoł, hałoŭnym punktam jakoha značyłasia spynieńnie ahniu. Jak zajaŭlajuć baki kanfliktu, pieramirje ŭ asnoŭnym vykonvajecca, idzie pastupovy abmien pałonnymi.