Na pieršuju sustreču kłuba «Mova Tut» pryjšło kala sotni čałaviek
Kaardynatarka prajekta «Mova Tut» Alona Šaramiet-Andrejeva. Adam Hłobus padaryŭ svoj zbornik vieršaŭ za najlepšaje pytańnie z zały. Moŭny kłub naviedała dyrektar Dziaržaŭnaha litaraturnaha muzieja Janki Kupały Alena Laškovič. Na «Movu TUT» minčuki prychodziać siemjami. Malunki z vystavy «Minsk-Vilnia: mastacki maršrut Adama Hłobusa». U hety raz dzietki hladzieli multfilm «Šrek» pa-biełarusku.
12 listapada ŭ staličnym ofisie partała Tut.by raspačaŭ siezon biełaruskamoŭny prajekt «Mova Tut». Arhanizatary pazicyjanujuć inicyjatyvu nie jak moŭnyja kursy, a chutčej jak admysłovy kłub.
«Heta prastora dla sustrečy ludziej, jakija chočuć papraktykavacca ŭ biełaruskaj movie, ale saromiejucca razmaŭlać na joj u zvyčajnym žyćci, — tłumačyć kaardynatarka prajektu Alona Šaramiet-Andrejeva. — U miežach kłuba možna atrymać viedy i pašyryć svoj leksikon dla taho, kab źniać moŭny barjer pad nazvaj «ja nie viedaju, jak heta nazyvajecca pa-biełarusku».
Pieršaja častka sustrečy – heta urok, jaho buduć vieści vykładčyki fiłałahičnaha fakulteta BDU. Druhaja – razmova z mastakom, kulturaznaŭcam albo historykam. Arhanizatary płanujuć, što ŭsie sustrečy buduć tematyčna zaviazanyja na karcinach.
Jašče adna asablivaść prajekta: arhanizatary prapanujuć brać z saboj dzietak, jany buduć hladzieć mulciki ŭ pierakładzie na biełaruskuju movu ŭ asobnym pakoi.
Pieršym hościem prajekta staŭ paet i mastak Adam Hłobus sa svajoj vystavaj «Minsk-Vilnia».
«Abjadnoŭvaje nie mova, a razmova!» – paetyčna sfarmulavaŭ Adam Hłobus.
Prachodzić sustrečy na praśpiekcie Dziaržynskaha, 57, buduć raz na dva tydni, chutčej za ŭsio – u sierady ŭviečary, abviestki buduć źjaŭlacca na infarmacyjnym partale Tut.by, a taksama ŭ sacyjalnych sietkach.