Bolš za 11 tysiač stužačak ź biełaruskim arnamientam razdali na vulicach Minska
fota Iryny Arachoŭskaj
Bolš za 11 tysiač stužačak ź biełaruskim arnamientam razdali 6 śniežnia prachožym na vulicach Minska vałanciory padčas akcyi «Paznač siabie biełarusam», jakuju arhanizavała abjadnańnie «Art Siadziba».
Kala 100 vałancioraŭ bolš jak u dvuch dziasiatkach ažyŭlenych kropak stalicy razdali da piaci tysiač mietraŭ arnamientalnaj stužki. Jak paviedamlajuć udzielniki akcyi, bolšaść ludziej, niezaležna ad ich uzrostu, pazityŭna ŭspryniali akcyju, z zadavalnieńniem brali stužački i prymacoŭvali ich na adzieńnie, na sumki, mašyny i h.d.
Jak adznačyŭ u intervju BiełaPAN adzin z udzielnikaŭ akcyi Franak Viačorka, było vielmi pryjemna bačyć, jak ludzi roznaha ŭzrostu — dzieci, moładź, pažyłyja — stanoŭča reahavali na stužački ź biełaruskim arnamientam.
Akcyja była azmročana incydentam u rajonie staličnaha Kamaroŭskaha rynku, dzie padčas razdačy stužačak zatrymali dyrektara «Art Siadziby» Paŭła Biełavusa, hramadskaha aktyvista i žurnalista Franaka Viačorku, a taksama fatohrafa Uładzimira Hrydzina. Jany byli zatrymany apoŭdni, kali kala ich sabrałasia zanadta šmat ludziej, jakija pažadali atrymać stužački z arnamientam. Milicyjaniery skazali, što im patelefanavali i paviedamili ab praviadzieńni akcyi.
U adździaleńni milicyi Savieckaha RUUS va ŭdzielnikaŭ akcyi ŭziali tłumačeńni, paśla čaho adpuścili. Pratakoły ŭ dačynieńni da ich nie składalisia. Kala 30 stužačak z arnamientam zastalisia ŭ milicyi.
Arhanizatary majuć namier i dalej pravodzić takija akcyi.