Dola ruskich u nasielnictvie Kryma vyrasła z 58 da 68%
Takija vyniki daŭ pierapis nasielnictva, praviedzieny rasijskimi ŭładami.
U časie pierapisu ŭvosień 2014 hoda ŭkraincy i biełarusy Kryma masava zapisvalisia — abo ich masava zapisvali — ruskimi. U vyniku dola ruskich u nasielnictvie rezka vyrasła. Adnačasova kožny piaty krymski tataryn sprabavaŭ zapisacca prosta tatarynam.
Jak paviedamiła načalnica ŭpraŭleńnia statystyki nasielnictva i achovy zdaroŭja Fiederalnaj słužby statystyki Rasii Śviatłana Nikicina, «samaj šmatlikaj nacyjanalnaj hrupaj nasielnictva na krymskim paŭvostravie źjaŭlajucca ruskija — 1492 tysiač čałaviek (68% nasielnictva, jakija ŭkazali nacyjanalnaść). Pra heta jana raskazała na «kruhłym stale», pryśviečanym papiarednim vynikam pierapisu nasielnictva. Kruhły stoł prajšoŭ u Simfieropali.
Pierapis nasielnictva ŭ Krymie prachodziŭ z 14 pa 25 kastryčnika 2014 hoda, praz 7 miesiacaŭ paśla zachopu paŭvostrava Rasijaj.
Kolkaść ruskich u časie pierapisu 2001 hoda składała 58% (u 1897 hodzie ruskich było 33%, a krymskich tataraŭ — 35%, paviedamlaje Vikipiedyja).
Dola ŭkraincaŭ u Krymie, pavodle pierapisa, źniziłasia z 24 da 16%.
Treciaja pa kolkaści hrupa — krymskija tatary, jakich, pavodle pierapisu, pražyvaje 232,3 tysiačy čałaviek (10,6% nasielnictva). Akramia taho, pavodle dakumientaŭ, jašče 45 tysiač čałaviek (2%) nazvali siabie tatarami, nie nazvaŭšy nacyjanalnaść (krymskija tatary) całkam. «Ciapier pryniata rašeńnie pry apracoŭcy dadzienych tataraŭ z rodnaj movaj krymskatatarskaj adnieści da krymskich tataraŭ», — padkreśliła Nikicina.
Karaimaŭ (ciurkamoŭny narod, što spaviadaje varyjant judaizmu) zastałosia 535 čałaviek. Krymčakoŭ — 228 čałaviek.
U paraŭnańni z usieŭkrainskim pierapisam nasielnictva 2001 hoda, pa słovach Nikicinaj, kolkaść ukraincaŭ skaraciłasia na 40%, biełarusaŭ — na 38%.