Biełaruskaja kniha ŭ Kijevie
Na knižnaj vystavie «Knižny Arsienał», jakaja projdzie 22-26 krasavika ŭ Kijevie, paŭstanie biełaruski stend, prezientavany inicyjatyvaj Books from Belarus. Stend pradstavić knihi ajčynnych vydaviectvaŭ, a ŭ miežach ahulnaj prahramy projduć biełaruskija litaraturnyja imprezy.
Da taho ž na stendzie budzie pradstaŭleny katałoh «Books from Belarus» / «Knihi ź Biełarusi». Katałoh, jaki dla zručnaści zamiežnych vydaŭcoŭ i litaraturnych ahientaŭ vydadzieny pa-anhlijsku, pradstaŭlaje anatacyi tvoraŭ Vasila Bykava, Alesia Razanava, Viktara Kaźko, Barysa Piatroviča, Uładzimira Niaklajeva, Ihara Babkova, Aleny Brava, Adama Hłobusa, Uładzimira Arłova, Ludmiły Rubleŭskaj, Alhierda Bachareviča, Uładzimira Kazłova.
Books from Belarus — heta supolnaja inicyjatyva niezaležnych vydaŭcoŭ Biełarusi, siarod jakich Sajuz biełaruskich piśmieńnikaŭ, 34mag.net i Litaraturny Dom «Łohvinaŭ». Meta kampanii – prasoŭvańnie ajčynnaj litaratury na suśvietnym knižnym rynku, naładžvańnie suviaziaŭ i kamunikacyi ź litaraturnymi ahientami dy vydaŭcami ź inšych krain, farmavańnie intelektualnaha imidža Biełarusi za miažoj. Letaś prajekt Books from Belarus uziaŭ udzieł u Frankfurckim i Varšaŭskim knižnych kirmašach.
Adras knižnaj vystavy ŭ Kijevie:
vuł. Łavrśka, 10-12, stend Books from Belarus (D-11)
Raskład biełaruskich imprezaŭ
24 krasavika. Biełaruska-ŭkrainski almanach «Sprava»
12.00—12.45, Kinazała
Tavarystva ŭkrainskaj litaratury pry Sajuzie biełaruskich piśmieńnikaŭ prezientuje biełaruska-ŭkrainski almanach «Sprava» pry ŭdziele: Natałki Babinaj, Alesia Navaryča, Natalli Marčanki, Uładzisłava Achromienki.
24 krasavika. 14:00, Pojetična ściena. Biełaruska-ŭkrainski paetyčny vystup:
Alena Ściepanienka, Illa Stranhoŭski, Siarhiej Pryłucki, Juryj Zavadski, Dmytro Łazutkin
Padčas vystupu buduć prezientavanyja knihi vydaviectva «Krok»
24 krasavika. «Niezaležnyja vydaŭcy: knihi pa-za mejnstrymam»
14:00—15:00, Kinazała
Majstar-kłas «Jak «pradacca» za miažu i jak prydbać pravy na vydańnie?» – ad najvialikšych vydaviectvaŭ Ukrainy i Biełarusi, jakija aryjentujucca na zamiežny rynak. Z udziełam Ihara Łohvinava.
24 krasavika. Aŭtohraf-siesija Artura Klinava
16:00—17:00, Stend Books from Belarus (D-11)
Aŭtohraf-siesija Artura Klinava z nahody vychadu jaho novaj knihi «Škłatara».
24 krasavika. Chadanovič i Žadan
18:00—18:45, Paetyčnaja scena (Padvorje Arsienału)
Siarhiej Žadan prezientuje knihu «Ukrainskija avijalinii» biełaruskaj movaju, a Andrej Chadanovič «Biełaruski mužčyna» – ukrainskaju. Padvojnaja prezientacyja vydaviectva «Krok».
24 krasavika. Prezientacyja ramana Śviatłany Aleksijevič
19:00—20:00, Scena «Kafie Jevropa»
Prezientacyja ramanu Śviatłany Aleksijevič «Čas Second-Hand», vydaviectva «Duch i Litiera». Z udziełam Śviatłany Aleksijevič i Aksany Zabužki. Maderatar — Leanid Finbierh.
25 krasavika. Ihar Łohvinaŭ: «Cenzura i knižny biźnies: biełaruski vypadak»
14:00—14:45, Kinazała
Lekcyja Ihara Łohvinava «Cenzura i knižny biźnies». Arhanizatary — CSM (Fundacyja «Cientr Sučasnoho Mistiectva») i Korydor.
Stend Books from Belarus zaprašaje na adviedki ŭsich achvočych, a asabliva pradstaŭnikoŭ biełaruskaj dyjaspary va Ukrainie