Ukrainski paet Siarhiej Žadan pryvioz u Minsk muzyčny prajekt — siońnia, 4 červienia
Ukrainski piśmieńnik №1 viazie ŭ Miensk svoj muzyčny prajekt. Razam z charkaŭskim hurtom «Sobaki v kosmosi» jon pradstavić užyvuju ŭ Biełarusi albom «Bijsia za nieï» u miežach eŭrapiejskaha turu.
Siarhiej Žadan — topavy ŭkrainski piśmieńnik. Jon piša jak prozu, tak i paeziju, maje mižnarodnyja ŭznaharody, vice-prezydent Asacyjacyi ŭkrainskich piśmieńnikaŭ. Nadzvyčaj papularnyja jaho paetyčnyja zborniki «Maradona», «Jefiopija», «Piepsi», raman «Diepieš Mod», knihi «Himn diemokratičnoji mołodi», «Anarchy in the UKR», «Vorošiłovhrad» dy inšyja. Jaho tvory aktyŭna pierakładajucca na biełaruskuju movu. Padčas mienskaha kancerta budzie prezentavana kniha vybranych vieršaŭ«Ukrainskija avijalinii» ŭ pierakładzie 11 biełaruskich siabroŭ Siarhieja Žadana.
Z 2008 hodu Žadan vystupaje na muzyčnaj scenie razam z hurtom «Sobaki v kosmosi». Styl svoj paznačajuć jak «ska», «ska-pank», «etna-pank», «dyska-pank».
U ich darobku ŭžo try albomy — «Sportivnij kłub armiji» (2008), «Zbroja proletariatu» (2012), apošni albom «Bijsia za nieji» (2014) i pieśni z novaj prahramy «10 praviednikiv».
U Miensk Žadan i «Sobaki v kosmosi» pryjaždžajuć upieršyniu (raniej Siarhiej byŭ u nas tolki z paetyčnymi vystupami). Hałoŭnaja nahoda — prajekt Global Reload, jaki ładzić partał Tuzin.fm i kampanija «Budźma biełarusami!». Da jaho ŭžo zapisali tvory Karł Fryjersan z hurta De Phazz, francuski hurt Karpatt i rasiejski śpiavak Andrej Makarevič. Žadan rychtuje svaju pieśniu, jakuju źbirajecca zapisać z hurtom u Miensku, a razam z tym prezentavać užyvuju albom «Bijsia za nieji» i zusim novuju prahramu.
«My vypraŭlajemsia ŭ červieni ŭ tur «10 praviednikiv», i pieršym zamiežnym horadam budzie mienavita Miensk.
Čamu vielmi radujemsia — u Biełarusi my ani razu nia hrali, niahledziačy na toje, što naš albom «Zbroja proletariatu» ŭpieršyniu źjaviŭsia mienavita na biełaruskim internet-resursie. Tamu z radaściu hraćmiem dla siabroŭ-biełarusaŭ najlepšyja rečy sa starych albomaŭ, a taksama rečy z našaj novaj prahramy, jakuju nieŭzabavie zapišam. Jana vychodzić cikavaja i pa-svojmu niečakanaja — my ciapier źviartajemsia da apakaliptyčnaj tematyki. Tamu pavinna być aptymistyčna i žyćcieśćviardžalna», — abiacaje Siarhiej Žadan svaim mienskim prychilnikam i prezentuje zahałoŭnuju pieśniu z prahramy, pakul što ŭ łajv-varyjancie.
***
4 červienia 19:00. Siarhiej Žadan i «Sobaki v kosmosi». Prezentacyja albomu «Bijsia za nieï». Miesca: Jack Club (vuł. Niamiha, 12). Kvitki ŭ kasach i on-łajn u apieratara Kvitki.by. Košt (papiarednie)— 200 000 rub. (tancplac), 250 000 rub. (stolik). Infalinija — +375 29 687-20-93.