Viečary kłasičnaj muzyki adrepietavali na dachu velcom FOTA
Čatyry suboty zapar kłasičnaja muzyka budzie hučać pad Ratušaj. Milicyi mnoha nie budzie.
U sieradu, 8 lipienia na dachu ofisa velcom u Minsku hučała kłasičnaja muzyka — duchavaja siekcyja repietavała svoj vystup, a arhanizatary viečaroŭ kłasičnaj muzyki raspaviali pra budučyja mierapryjemstvy.
Paśla paśpiachovych «Džazavych viečaroŭ ź BiełVEB» fond «Ideja» supolna z velcom zładzić pad Ratušaj čatyry open-air-kancerty kłasičnaj muzyki. 11, 18, 25 lipienia i 1 žniŭnia prahučać Mocart, tanha, muzyka Baroka i tvory Ahinskaha. Pačatak a 8-j viečara.
Prahrama čatyroch viečaroŭ krajnie raznastajnaja — z ulikam niezvyčajnaha farmatu arhanizatary vyrašyli pradstavić kłasiku roznych časoŭ i miaścin.
Čytajcie padrabiaźniej: Mocart, tanha, baroka, Ahinski i mała milicyi: što kali na Viečarach kłasičnaj muzyki pad Ratušaj
Užo zvykły farmat džazavych viečaroŭ — kancert pad volnym pavietram, płošča Svabody, biaspłatny ŭvachod — budzie dapoŭnieny vializnym ekranam na scenie i siurpryzami, jakija arhanizatary nazvali «interaktyŭnymi fišami».
«Kłasičnuju muzyku lubiać usie, prosta nie ŭsie viedajuć pra heta», — adznačyŭ Alaksandr Čachoŭski, kiraŭnik muzyčnaha domu «Kłasika». Pavodle jaho słoŭ, viečary kłasičnaj muzyki zrobiać cikavymi i maładym, i starym, i rabočym, i chipstaram. Usie tvory buduć vykonvać biełarusy: maŭlaŭ, u nas vielmi šmat vydatnych muzykaŭ, chto nie vieryć — chaj pryjdzie i pravieryć ich prafiesijanalizm!
Načalnik upraŭleńnia markietynhu velcom Julija Dajnieka dadała, što pavodle analizu apieratara, samymi papularnymi kłasičnymi tvorami ŭ biełarusaŭ možna nazvać «Ščaŭkunčyka» Piatra Čajkoŭskaha i «Čatyry siezony» Vivaldzi — mienavita imi abanienty najčaściej siarod sotni kłasičnych miełodyj zamianiajuć standartnyja hudki praz pasłuhu «Miełafon».
Jak raspaviała dyrektar fonda «Ideja» Natalla Kucan, paśla džazavych viečaroŭ i viečaroŭ kłasičnaj muzyki mohuć adbycca i folk-viečary, a ŭ nastupnym hodzie muzykaj u Vierchnim horadzie płanujecca zapoŭnić chiba nie kožnuju subotu.
Na apošnim džazavym viečary niekatoryja naviedniki narakali na miery biaśpieki, jakija paličyli praźmiernymi — aŭtaraki, aharodžy, mietałašukalniki… Na viečarach kłasičnaj muzyki takoha nie pavinna być, kažuć arhanizatary. Jany paprasili prabačeńnia za niazručnaści i nazvali situacyju supadzieńniem: miery biaśpieki byli nadzvyčajnymi ŭ suviazi z pryjezdam u Minsk patryjarcha Kiryła i vialikaj kancentracyjaj ludziej (jak słuchačoŭ, tak i viernikaŭ) u centry horada. U dni viečaroŭ kłasičnaj muzyki vizitaŭ aficyjnych asob nie čakajecca, tamu ad AMAPa budzie tolki niekalki čałaviek.
Čytajcie taksama:
30 muzyčnych festaŭ blizkaha i dalokaha zamiežža