Upieršyniu prezidenckija vybary ŭ Biełarusi projduć biez adkryta apazicyjnych kandydataŭ
Staršynia Abjadnanaj hramadzianskaj partyi Anatol Labiedźka ŭ intervju «Našaj Nivie» paviedamiŭ, što jahonaja inicyjatyŭnaja hrupa nie budzie zdavać sabranyja podpisy ŭ Centrvybarkam.
«Dakładnuju ličbu mahu nazvać tolki ŭ paniadziełak. Ciapier idzie źviadzieńnie kančatkovych ličbaŭ», — kaža Labiedźka.
Staršynia AHP škaduje tolki ab tym, što stracić mahčymaść vystupić na dziaržaŭnym telebačańni. «Pa ŭsich inšych punktach praca budzie praciahvacca ŭ takim samym režymie. My budziem stavić pikiety, pijaryć prahramu «Miljon novych rabočych miescaŭ». Mahčyma, pačniem zbor podpisaŭ za adstaŭku ŭrada i staršyni CVK Lidzii Jarmošynaj».
Labiedźka stavić pad sumnieŭ, što patrebnuju kolkaść podpisaŭ sabraŭ navat Alaksandr Łukašenka. «Našy pikiety znachodzilisia pobač. Za Łukašenku padpisvałasia ŭ 5—6 razoŭ mieniej. Mahčyma, jon zmoh sabrać 200 tysiač pašpartoŭ, ale nijak 100 tysiač podpisaŭ».
Raniej pra vychad z kampanii zajaviŭ kiraŭnik Partyi levych «Spraviadlivy śviet» Siarhiej Kalakin.
Takim čynam, u kampanii zastajecca tolki Taćciana Karatkievič. Jana vyjšła z apazicyjnych struktur, ale na vybary idzie, nie krytykujučy Alaksandra Łukašenki.
Padtrymlivać kahości z kandydataŭ, što majuć namier zastavacca ŭ vybarach Labiedźka nie płanuje.
Kalakin zajaviŭ, što nie vieryć, što Karatkievič udałosia naźbirać 100 tysiač podpisaŭ, nieabchodnych dla rehistracyi. Jon zaklikaŭ svaich prychilnikaŭ hałasavać suprać usich.
Upieršyniu prezidenckija vybary ŭ Biełarusi projduć, faktyčna, biez adkrytaj krytyki prezidenta. Raniej takija vybary mieli miesca tolki ŭ Kazachstanie i krainach Centralnaj Azii.