Mierkavańnie: Ukrainskaj armii bolš nie treba dapamoha biełarusaŭ, nie adryvajciesia ad radzimy
Abmiarkoŭvajcie!
Paŭtara hoda tamu Centralnaja Jeŭropa apynułasia pierad strašnaj pahrozaj. Rasija była hatovaja zaniać uvieś poŭdzień Ukrainy, da Adesy, kab stvaryć tam «Navarosiju», Novuju Rasiju. Heta całkam razburyła b jeŭrapiejski paradak, što ŭstanaviŭsia paśla 1990 hoda. Realizacyja takoha płana nie tolki stvaryła b śmiarotnuju pahrozu niezaležnaści Biełarusi, ale i mahła pryvieści da spaŭzańnia śvietu ŭ nievarać Treciaj suśvietnaj vajny.
U toj situacyi śviadomyja biełarusy ličyli za svoj abaviazak dapamahčy bratam-ukraincam usimi mahčymymi sposabami.
Paśla zryvu płanaŭ rasijskich šturmavikoŭ u Charkavie i Adesie ŭ krasaviku—mai, usienarodnaha abrańnia novaha prezidenta Ukrainy, šturmu aeraporta Daniecka ŭ mai i vyzvaleńnia Słavianska ŭ lipieni stała jasna, što Navarosiju «znutry» stvaryć nie ŭdasca. Adnak Rasija praciahvała zabiaśpiečvać procipavietranaje prykryćcio «apałcencaŭ» u Danbasie i ŭzbrojvać ich. Zastavaŭsia jašče apakaliptyčny varyjant poŭnamaštabnaj interviencyi Rasii.
Niepadrychtavanaj była tady ŭkrainskaja armija, ale, jakaja b jana ni była, jana abaraniała tady nie tolki Jeŭropu, ale ŭsiu Jeŭropu. Voś u toj situacyi niekatoryja biełaruskija adpraŭlalisia vajavać va Ukrainu.
«Va Ukrainie my abaraniajem Biełaruś. Kali Rasija pieramoža va Ukrainie — nastupnaj budzie Biełaruś!» – kazali jany.
Aficyjnaja Biełaruś tady zaniała padkreślena niejtralnuju pazicyju, ale, varta nahadać, nikoli nie spyniała pastaŭki žyćciova nieabchodnaj Ukrainie salarki.
Praŭ paŭtara hoda situacyja źmianiłasia. Ukrainskaja armija z hora ź biady stała bolš bajazdolnaj. Uschodni Danbas zastajecca akupavanym, ale Maskva była vymušanaja padpisać kampramisnyja Minskija pahadnieńni, dasiahnutyja pry spryjańni Alaksandra Łukašenki.
Krym zastajecca rasijskim – ale va ŭmovach enierhietyčnaj błakady i nafty pa 45 usio heta ŭžo hladzicca zusim nie tak, jak paŭtara hoda tamu.
Havorki pra interviencyju va Ukrainu aficyjnyja rasijskija ŚMI spynili.
Bolš za toje, Rasija ŭsio bolš zahruzaje ŭ kanflikcie na Blizkim Uschodzie. Stanovicca realnaj naziemnaja apieracyja Rasii ŭ Siryi. Paŭnavartasna vajavać na niekalki frantoŭ Rasija nie zmoža. I choć minuły zimovy pieryjad byŭ časam aktyvizacyi dziejańniaŭ rasijanaŭ na ŭschodzie Ukrainy (ziamla stała ćviordaj, i tamu było lahčej ažyćciaŭlać nastup na Debalcava), u hetym hodzie takoj aktyŭnaj zimy na Danbasie, imavierna, nie budzie.
Paŭstaje pytańnie: jaki sens dalejšaha ŭdziełu biełarusaŭ va ŭkrainska-rasijskaj vajnie?
Vajennaha sensu ŭ tym bolš niama.
Infarmacyjny sens? Za paŭtara hoda vajny tezis «biełarusy salidarnyja z Ukrainaj» byŭ paśpiachova daniesieny da ŭkraincaŭ.
Nabyćcio vopytu? Patryjoty Biełarusi najmienš chočuć, kab taki vopyt biełarusam kaliści spatrebiŭsia. Nie daj Boh!
Pry hetym treba pamiatać, što častka biełarusaŭ, jakija ŭziali ŭdzieł u vajnie na baku Ukrainy, tak i nie zmohuć u bližejšy čas viarnucca na Radzimu. Miž tym biełaruskija patryjoty najbolš patrebnyja Biełarusi, a nie Ukrainie.