U hrabnicy Tutanchamona znajšli dva patajemnyja pakoi
Ministr pa spravach antyčnaści Jehipta Mamduch Al Damaci paviedamiŭ, što z dapamohaj radyjołakacyjnaha skanavańnia udałosia vyjavić, što ŭ hrabnicy Tutanchamona majucca jak minimum dva schavanyja pakoi, u jakich znachodziacca mietaličnyja pradmiety i pradmiety «arhaničnaha pachodžańnia».
Nikałas Ryŭz vykazaŭ zdahadku, što Tutanchamon byŭ pachavany ŭ hrabnicy, jakaja pieršapačatkova pryznačałasia dla Niefiercici. Fota AR
Pa słovach ministra, dakładnaść vysnoŭ, zroblenych na asnovie skanavańnia, składaje 90%.
Archieołahi miarkujuć, što ŭ niadaŭna vyjaŭlenych schavanych pamiaškańniach hrabnicy Tutanchamona moža znachodzicca pachavańnie staražytnajehipieckaj carycy Niefiercici.
Niefiercici była carycaj Staražytnaha Jehipta ŭ 1351-1334 hadach da našaj ery. Ličycca, što Niefiercici, žonka faraona Amienchatepa, była mačachaj Tutanchamona.
Brytanski archieołah Nikałas Ryŭz ličyć, što Tutanchamon, jaki raptoŭna pamior va ŭzroście 19 hadoŭ, byŭ pachavany ŭ piaredniaj častcy hrabnicy, jakaja, imavierna, pieršapačatkova pryznačałasia dla Niefiercici.
Nikałas Ryŭz letaś vyjaviŭ na fotazdymkach fresak u mahilnym sklepie Tutanchamona ślady dvuch dźviarnych prajomaŭ, schavanych pad tonkim płastom tynkoŭki, adzin ź jakich moža vieści ŭ tajemnuju i da hetaha času nie znojdzienuju hrabnicu carycy Niefiercici. Paśla hetaha było pryniata rašeńnie ab praviadzieńni skanavańnia dvuch pamiaškańniaŭ.
Hrabnica Tutanchamona była znojdzienaja ŭ 1922 hodzie.