Samalot «Biełavija» rejsam na Charkaŭ viarnuŭsia ŭ aeraport Minsk u vyniku niaspraŭnaści, na borcie byŭ u tym liku Barys Hrabienščykoŭ
dapoŭniena
«Na borcie samalota «Biełavija» (madel CRJ), jaki lacieŭ siońnia nočču ŭ Charkaŭ, uźnikła niaspraŭnaść. Byŭ mocny chłapok, paśla čaho ŭ sałonie patychnuła harełym, — napisaŭ nam čytač «Našaj Nivy» Kanstancin. — U vyniku samalot viarnuŭsia ŭ Minsk, doŭha vypracoŭvaŭ paliva, paśla čaho paśpiachova sieŭ u supravadžeńni pažarnych mašyn i karet chutkaj. Praź niejki čas pasažyraŭ adpravili ŭ Charkaŭ inšym bortam, užo Embraer-am».
«Cikava, što pasažyrami rejsa byli ŭdzielniki hrupy «Akvaryum» i sam Barys Hrabienščykoŭ, što lacieli na kancert va Ukrainu», — adznačaje Kanstancin, jaki pracuje scrum-trenieram u mižnarodnaj kampanii.
Zhodna z raskładam palotaŭ aeraporta Charkaŭ, rejs ź Minska («Embrajer») prybyŭ 4 krasavika a 2.39 zamiest 0.15 pa raskładzie.
U raskładzie «Biełavija» ŭ adzin čas paznačany vylety na Charkaŭ i na Minsk u 23.00 i viartańnie CRJ 100/200 u Minsk u 23.57.
Jak patłumačyli «Našaj Nivie» ŭ adździele markietynhu avijakampanii «Biełavija», u CRJ spracavała sihnalizacyja, što šasi nie prybrana. U vyniku kamandzir pryniaŭ rašeńnie vypracavać paliva i viarnucca ŭ Minsk.