Pahłybcie svaje viedy pra kniazia Alhierda: u Minsku pracuje vystava, pryśviečanaja hetaj vybitnaj histaryčnaj asobie
U Respublikanskaj mastackaj halerei Biełaruskaha sajuza mastakoŭ (Pałac mastactva, vuł. Kazłova, 3) pracuje vystava «Kniaź Alhierd u vyjaŭlenčym mastactvie», pryśviečanaja 720-hodździu z dnia naradžeńnia Vialikaha kniazia Litoŭskaha Alhierda — viadomaha dziaržaŭnaha dziejača, refarmatara, talenavitaha palityka i pałkavodca.
Letapis žyćcia hetaj vybitnaj histaryčnaj asoby staŭ krynicaj natchnieńnia dla mnohich mastakoŭ, jakija pryśviacili joj svaje tvory.
U honar 720-hodździa z dnia naradžeńnia Vialikaha kniazia Biełaruski sajuz mastakoŭ padrychtavaŭ respublikanski vystavačny prajekt «Kniaź Alhierd u vyjaŭlenčym mastactvie», prezientacyja jakoha adbyłasia ŭ Noč muziejaŭ u Mastackim muziei na Zamkavaj hary ŭ horadzie Viciebsku. Mienavita na tym miescy, dzie ŭ čatyrnaccatym stahodździ raźmiaščalisia kniaskija pałaty Alhierda.
Imia Alhierda maje niepasrednaje i vialikaje dačynieńnie da historyi horada Viciebska. U 1318 hodzie 22-hadovy Alhierd ažaniŭsia ź viciebskaj kniazioŭnaj Maryjaj, adzinaj dačkoj viciebskaha kniazia Jarasłava.
Alhierd, jak piša pra jaho Maciej Stryjkoŭski, adroźnivaŭsia dobrym vychavańniem, noravam, statnaściu, pryrodžanaj rycarskaj mužnaściu. Sučaśnik kniazia tak padaje jaho vobraz:
«Jon maje vieličny vyhlad, tvar jaho rumiany, pradaŭhavaty, nos vialiki, vočy błakitnyja, vielmi vyraznyja, brovy hustyja, śvietłyja, vałasy i barada śvietła-rusyja ź siviznoj, łob vysoki, čało łysaje, jon rostu vyšej siaredniaha, nie toŭsty, nie chudy, razmaŭlaje hołasam mocnym, vyraznym i pryjemnym; jon jeździć dobra vieršnikam, ale chodić, prychramvajučy na pravuju nahu, tamu zvyčajna abapirajecca na kijok».
U 1320 hodzie Alhierd, paśla śmierci Jarasłava, staŭ kniaziem Viciebskim. U vyniku Viciebsk i Viciebskaje kniastva ŭvajšli ŭ skład Vialikaha Kniastva Litoŭskaha.
U 1345 hodzie Alhierd staŭ Vialikim kniaziem VKŁ. Jon prasłaviŭsia ŭ historyi jak adzin z samych mocnych i ŭpłyvovych palitykaŭ. U dadatak da vobrazu kniazia možna pryvieści słovy letapisca: «Alhierd byŭ chitrym i prazorlivym, śmiełym i pamiarkoŭnym, ryzykovym i ciarplivym, vielmi razumnym pravicielem. Jon mnohimi movami moh razmaŭlać. Jon ustrymańnie mieŭ vialikaje, ad usialakaj mituśni, paciech i hulniaŭ advaročvaŭsia, vina i piva, i miodu chmielnaha nie piŭ, ad hetaha vialikaha rozumu mocnuju dušu mieŭ i hetym mnohija hrady i kniastvy zavajavaŭ i nie stolki siłaju, kolki mudraściu vajujučy».
U prajekcie «Kniaź Alhierd u vyjaŭlenčym mastactvie» pryniali ŭdzieł bolš za piaćdziesiat biełaruskich mastakoŭ: h. Minsk - Cimochaŭ S., Suša A., Karpiankoŭ A., Hardzijonak I., Zimienka A., Kozieł H., Ihumnaŭ D., Kuźmič P., Humileŭski S., Śviancicki I., Ahunovič E., Drazdoŭ H., Višnieŭski U., Buniejeva D., Hrak H., Šurmialoŭ F., Ryžy M., Sakałova-Kubaj N., Kupava M., Šyškova D., Kasabucki I., Kašeŭski P., Kuźniacova V., Kancadajłaŭ U., Hołubieŭ U., Hajdukova Ju.,Baryčeŭski A., Łaska T., Salivončyk A., Markaviec V., Ivanoŭ Ja., Simanovič K., Jaremič V., Darožka M.; Viciebsk - Laŭkovič M., Barankoŭskaja S., Lićvin U., Valnoŭ U., Jaŭsiejeŭ A., Urubleŭskaja S., Kastahryz A., Maklacova T., Sotnikaŭ S., Łałyka B., Vasiljeŭ V.; Mahiloŭ - Koršunaŭ R., Pachaŭcaŭ V., Famina T., Sivakova Ł., Nieściaruk Ju.; Połack - Kozik T.
Vystava budzie pracavać da 17 lipienia.
Čas, kali možna jaje naviedać: 11.00 — 19.00 štodzień, aprača paniadziełka.
Telefony dla daviedak: (017) 288 15 49, (017) 290 60 10 — Pałac mastactva; (017) 296 67 84 — Biełaruski sajuz mastakoŭ.
Ź infarmacyjaj pra minułyja, dziejnyja i zapłanavanyja vystavy možna aznajomicca na sajcie Biełaruskaha sajuza mastakoŭ belartunion.by