Ukrainskija archieołahi znajšli na Pałtaŭščynie pachavańni piaci vojaŭ Vitaŭta FOTA
Padčas šostaj Hlinskaj archiealahičnaj ekspedycyi ŭkrainskija historyki znajšli rečavyja dokazy ciesnych stasunkaŭ Vialikaha Kniastva Litoŭskaha ź jeŭrapiejskimi krainami ŭ časy kniazia Vitaŭta, jaki kiravaŭ dziaržavaj u kancy XIV—pačatku XV stahodździa. Pavodle daśledčykaŭ, stasunki byli naładžanyja jašče raniej za słavutuju Hrunvaldskuju bitvu.
Pra heta śviedčać znachodki, zroblenyja na raskopkach va ŭročyščy Levadniukava hara niepadalok ad siała Hlinskaje ŭ Ziańkoŭskim rajonie Pałtaŭskaj vobłaści, paviedamlaje miascovy resurs bastion.tv.
Tam było znojdziena pachavańnie 5 vieršnikaŭ, jakija, vierahodna, słužyli ŭ vojsku kniazia Vitaŭta i zahinuli padčas niaŭdałaj dla kniazia bitvy z vojskam Załatoj Ardy na race Vorskła ŭ 1399 hodzie. Pra toje, što pachavanyja mienavita vajskoŭcy, śviedčać reštki zbroi i vajskovych pryładaŭ, znojdzienyja pry raskopkach.
Na prynaležnaść pachavanych da vieršnikaŭ ukazvajuć asablivaści ich kostak. Da jazdy na koniach ludziej u tyja časy treniravali ź dziacinstva, što adbivałasia na pabudovie škiletu.
Asablivaj uvahi zasłuhoŭvajuć znojdzienyja maniety. Pieršaja — załataardynski puł. Kožny chan tady čakaniŭ svaju manietu. Takaja valuta była ŭ abaračeńni davoli doŭha.
Znojdzienaja na pachavańni siarebranaja zachodniejeŭrapiejskaja manieta moža śviedčyć pra toje, što niechta z zahinułych vajskoŭcaŭ byŭ ź Jeŭropy i pastupiŭ na vajskovuju słužbu da kniazia Vitaŭta.
Pavodle ŭdzielnika ekśpiedycyi, ukrainskaha historyka Jarasłava Vaładarec-Urbanoviča, znachodki šostaj Hlinskaj archiealahičnaj ekśpiedycyi taksama abviarhajuć niekatoryja vysnovy savieckaj histaryčnaj navuki adnosna pachodžańnia nasielnictva Pałtaŭščyny dy jaho ekanamičnych znosin z susiedziami.
Znojdzienyja navukoŭcami reštki majsterni pa apracoŭcy burštynu śviedčać pra raźvityja znosiny z Bałtykaj, miarkuje navukoviec.