Viasioły čałaviek — syšoŭ akcior-kołasaviec Valancin Ćviatkoŭ
23 vieraśnia ŭ teatry imia Jakuba Kołasa ihrali kamiedyju «Jon. Jana. Akno. Niabožčyk.», jakaja zachoŭvajecca ŭ repiertuary z 2005 hoda. U roli Upraŭlajučaha na scenu vychodziŭ artyst, viadučy majstar sceny Valancin Ćviatkoŭ. Jon šmat žartavaŭ z «tavaryšami pa rabocie», tak jon zvyčajna nazyvaŭ svaich kaleh, chavajučy ščyryja pačućci, jakija žyli ŭ sercy hetaha vysokaha, mažnoha čałavieka. A 26 vieraśnia, na 69-m hodzie žyćcia, jaho nie stała…
Abšyrny infarkt, u vyniku — aciok lohkich. Drenna stała ŭ subotu, a litaralna ŭ piatnicu Valancin Alaksandravič zrabiŭ padarunak teatru, u jakim pravioŭ bolšuju častku žyćcia. U litaraturnuju častku pieradaŭ časopisy sa svajoj unikalnaj chatniaj biblijateki, jakuju źbiraŭ usio žyćcio.
Ćviatkoŭ Valancin Alaksandravič pracavaŭ ŭ teatry imia Jakuba Kołasa spačatku manciroŭščykam, a ŭ 1974 hodzie, paśla zakančeńnia Biełaruskaha dziaržaŭnaha teatralna-mastackaha instytuta, zaprošany režysioram Valeryjem Mazynskim na rolu Volchi ŭ śpiektakl «Zvany Viciebska». Cikavy charaktarny i kamiedyjny akcior.
Vobrazy, stvoranyja Ćviatkovym V.A., vyłučalisia žyćciovaj pierakanalnaściu, psichałahična-bytavoj padrabiaznaściu, jarkaj teatralnaj formaj. Siarod inšych možna adznačyć roli, stvoranyja ŭ kłasičnym repiertuary, takija, jak pan Baranoŭski («Nieścierka» V.Volskaha), Džym («Pryhody Hieklbiery Fina» M.Tvena), Vientura («Raŭnivaja da siabie samoj» Cirsa de Malina), Simiaon («Luboŭ pad viazami» Ju.O'Niła), Dziaržymorda («Revizor» M.Hohala), Vralman («Niedaraść» D.Fanvizina), Šamrajeŭ i Simiaonaŭ-Piščyk («Čajka» i «Višniovy sad» A.Čechava), Šel («I śmiech, i ślozy, i Luboŭ» pavodle U.Nabokava).
Za apošnija hady ŭ repiertuary akciora źjavilisia novyja raboty: Frejd («Pryvitańnie, Albiert!» Ju.Sochara), Susied («Vielmi prostaja historyja» M.Łado), Uradnik («Žarty» (viečar biełaruskich vadevilaŭ), Skamiejkin («Ja čakaju sapraŭdnaha mužčynu» E.Radzinskaha), Stary («Makbiet»U.Šekśpira), Dzied («Pachavajcie mianie za plintusam» P.Sanajeva), Susied («Vielmi prostaja historyja» M.Łado). Viciebskija dzietki dobra viedajuć Valancina Ćviatkova pa roli niezabyŭnaha Dziaduli Maroza.
Uznaharodžany nahrudnym znakam Ministerstva kultury «Za ŭkład u raźvićcio kultury Biełarusi» (2008), Hanarovaj hramataj Ministerstva kultury (2015). Łaŭreat Mižnarodnych teatralnych fiestyvalaŭ za vobrazy, stvoranyja ŭ śpiektaklach «Šachmaty», «Krakaŭski student», «Makbiet», «Pachavajcie mianie za plintusam».
Raźvitańnie z Valancinam Alaksandravičam adbudziecca 28 vieraśnia, u sieradu z 11:00 da 13:00 na vialikaj scenie teatra.
Daruj nam, darahi siabra. I chaj tabie budzie pucham biełaruskaja ziamielka.