Vybary ŭ Litvie: na pieršaje miesca vyjšli chryścijanskija demakraty
Lidary partyj-pieramožcaŭ: sielanin Ramunas Karbaŭskis, chryścijanski demakrat Habryelus Łandśbierhis, sacyjał-demakrat Alhirdas Butkiavičus.
Dźvie apazicyjnyja partyi pieramahajuć na vybarach u litoŭski sojm.
Sajuz baćkaŭščyny — Chryścijanskija demakraty Litvy nabraŭ 21,7% hałasoŭ. Ich ačolvaje ŭnuk Vitaŭtasa Łandśbierhisa Habryelus.
U Litoŭskaha sajuza sialan i zialonych (ŁSSZ) — 21,6%. Niekali Sajuz sialan uznačalvała Kazimira Prunskienie, ciapier na čale jaho staić charyzmatyčny Ramunas Karbaŭskis.
Kirujučyja sacyjał-demakraty premjera Butkiavičusa majuć 14,4%, Ruch libierałaŭ — 9%. U Sojm prachodziać taksama Vybarčaja akcyja palakaŭ Litvy / Sajuz chryścijanskich siemjaŭ — 5,5% i «Paradak i spraviadlivaść» — 5,3%.
Cikava, što Vybarčaja akcyja palakaŭ Litvy maje ciesnyja suviazi z Maskvoj i mienavita ad jaje ŭ Sojm bałatavalisia aktyvisty rasijskaj dyjaspary.
Za Partyju pracy, što taksama ŭvachodziła va ŭradavuju kaalicyju, prahałasavali 4,7% vybarščykaŭ i, takim čynam, jana nie prachodzić u Sojm. Minimalny barjer dla partyj składaje 5%.
Ciomna-zialony — Zialonyja i sialanie. Śvietła-zialony — chryścijanskija demakraty (vyjhrali va ŭsich vialikich haradach). Čyrvony — sacyjał-demakraty. Malinavy — Polska-ruski śpis. Žoŭty — partyja Paksasa. Sini — Partyja pracy. Krynica: dc1.maps.lt.
ŁSSZ, jaki nazyvaje siabie centrysckaj siłaj, śćviardžaje, što adkryty dla pieramovaŭ ab stvareńni kaalicyi jak z pravymi, tak i ź levymi. Pahadnieńni mahčymyja tolki paśla druhoha tura vybaraŭ, jaki adbudziecca 23 kastryčnika. Tady stanuć viadomyja pieramožcy pa adnamandatnych akruhach.