Ekśpiert: Vizit Łukašenki ŭ Pakistan moža być źviazany z žadańniem Biełarusi atrymać rakietnyja technałohii
Niadaŭni vizit Alaksandra Łukašenki ŭ Pakistan moža być źviazany z žadańniem Biełarusi atrymać rakietnyja technałohii.
Takoje mierkavańnie vykazaŭ ekśpiert u śfiery biaśpieki Andrej Parotnikaŭ, vystupajučy na Kanhresie daśledčykaŭ Biełarusi. Forum adbyŭsia ŭ Koŭnie (Litva) 7—9 kastryčnika.
Stvaralnik Belarus Security Blog Parotnikaŭ adznačyŭ, što na ŭsich sustrečach Łukašenki i pakistanskaha lidara Navaza Šaryfa prysutničaŭ pakistanski ministr abaronnaj pramysłovaści
Biełaruskija «Pałanezy» — siarod najlepšych u śviecie ŭ kłasie ciažkich RSZA. Skrynšot ź videa MA RB.
Tavarazvarot miž Biełaruśsiu i Pakistanam mizerny, i nievidavočna, za košt čaho jon moža raści. Miž tym Pakistan vałodaje adnosna prasunutymi rakietnymi technałohijami, jakija raźvivaŭ paralelna z naroščvańniem jadziernaha patencyjału. Hetaja kraina znachodzicca ŭ piermanientnym kanflikcie ź Indyjaj. Varta adznačyć, što ŭ svaich paviedamleńniach pra pieramovy pakistanskija ŚMI akcentavali ŭvahu na tym, što biełaruski bok padtrymaŭ pazicyju Isłamabada pa pytańni Kašmira — sprečnaj terytoryi ŭ pieradhorjach Himałajaŭ.
Na dumku Parotnikava, Biełaruś užo prykładna 10 hadoŭ imkniecca raźvivać rakietnyja technałohii. Hety namier uźnik zadoŭha da ŭkrainskaha kryzisu.
Pa słovach Parotnikava, Pakistan vałodaje tymi technałohijami, jakich biełaruskija pradpryjemstvy nie majuć.
U svaju čarhu, Pakistan moža być zacikaŭleny ŭ tych biełaruskich technałohijach, dzie biełarusy majstry.
Što cikava, sam Pakistan stvaryŭ ułasnyja kryłatyja rakiety, zakuplajučy ruchaviki va Ukrainie. Astatnija sistemy hetych rakiet pakistanskija inžyniery skapijavali z «Tamahaŭkaŭ», stračanych nad terytoryjaj Pakistana amierykanskaj armijaj pry naniasieńni ŭdaraŭ pa Afhanistanie. Što da ruchavikoŭ, to ich vyrablaje ŭkrainskaja kampanija «Motor-Sič», jakaja saŭładalnik ŭ tym liku avijaramontnaha zavoda ŭ biełaruskaj Oršy.
Pa jakich nakirunkach raźvivajecca biełaruskaja rakietnaja prahrama? Pa słovach Parotnikava, ich moža być čatyry. Pa-pieršaje, heta stvareńnie ciažkich rakietnych sistem załpavaha ahniu. Hetaja praca vyvieła na vytvorčaść «Pałanezaŭ» — u supracoŭnictvie z Kitajem. Pa-druhoje, heta stvareńnie zienitnych rakiet — tut adbyvałasia supracoŭnictva z Ukrainaj. Pa-treciaje, heta stvareńnie kryłatych rakiet. I, pa-čaćviortaje, vyrab procitankavych rakiet.
Pa słovach Parotnikava, ułasny rakietny ruchavik Biełaruś maje pačać vyrablać da 2020 hoda.
Analityk Alaksandr Alesin dadaŭ, što ŭ niekatorych technałohijach biełarusy najlepšyja ŭ śviecie. Heta, naprykład, kołavyja ciahačy, sistemy aŭtamatyzavanaha kiravańnia, srodki radyjoelektronnaj baraćby, sistemy aptyčnaha zandavańnia ziamli, a taksama technałohii optaelektronnaha naviadzieńnia. Dakładnaść naviadzieńnia «Pałanezaŭ» — najlepšaja ŭ śviecie ŭ svaim kłasie, adznačyŭ Alesin.
Sa słoŭ Alesina, pieršym kupcom «Pałanezaŭ» moža stać Azierbajdžan.
Šturškom dla raspracoŭki «Pałanezaŭ» stała niežadańnie Rasii pradać Biełarusi «Iskandery». Uvohule, na dumku Alesina, Maskva choča, kab Biełaruś straciła patencyjał abarony i tady vymušanyja była raźmiaścić na svajoj terytoryi rasijskija vojski.
U svaju čarhu, Biełaruś viadzie doŭhaterminovuju prahramu pieraŭzbrajeńnia ŭłasnaj armii tymi srodkami, jakija maje ŭ rasparadžeńni. «Ad rasijskaj armii heta nie abaronić, ale daje arhumient, kab nie puskać siudy rasijskija bazy», — miarkuje Alesin.
Što datyčyć supraćpavietranych rakiet, to, pa acency Parotnikava, havorka nie idzie pra stvareńnie kompleksu kłasa S-300. Havorka pra anałah «Buka-3». Na dumku ekśpierta, vyrab čahości bolš składanaha nie pad siłu Biełarusi ekanamična. «Kapitalizm dyktuje svaje ŭmovy, — kaža Parotnikaŭ. — Biełaruskaja armija nie maje srodkaŭ dla zakupu darahoj techniki. A zamiežny rynak takoj pradukcyi kankurentny i kansiervatyŭny».
Na Kanhres daśledčykaŭ Biełarusi ŭ Koŭna źjechalisia kala 500 udzielnikaŭ. Jany pracavali ŭ 16 siekcyjach — ad ekanomiki da biblistyki.