«Šlachami Słova»: Ks. Siarhiej Surynovič pračytaje zaŭtra publičnuju lekcyju pra biełaruskija pierakłady Biblii
Biełarusy nie majuć siońnia Śviatoha Pisańnia, jakoje b adpaviadała sučasnym navukovym kryteryjam biblijnaha pierakładu, ličyć daśledčyk Śviatoha Pisańnia i movaznaŭca ksiondz Siarhiej Surynovič, probašč parafii Śviatoj Troicy ŭ Drui Brasłaŭskaha rajona.
U svajoj lekcyi ŭ subotu jon raspaviadzie, jak Biblija na terytoryi sučasnaj Biełarusi pasialiłasia z časoŭ źjaŭleńnia na našych ziemlach paśladoŭnikaŭ Dobraj Naviny Isusa Chrysta, chryścijan i chryścijanstva, jakoje mieła dastatkova skamplikavanyja i adroznyja pad hledziščam pachodžańnia i tradycyj šlachi praniknieńnia. Słuchačy padrabiazna daviedajucca pra pierakład Skaryny, jaki byŭ zrobleny z Vulhaty śviatoha Hieranima, pierakładzienaj na češskuju movu i tamu całkam supadajučy z zachodniaj katalickaj tradycyjaj.
Fota z błoha lektara
Daśledčyk raspaviadzie, jak vydańniem biblijnych knih paźniej zajmalisia Vasil Ciapinski, Symon Budny, Ivan Fiodaraŭ i Piotr Mścisłaviec, Kanstancin-Vasil Astrožski, Stefan Zizanij, Mialecij Smatrycki, Śpirydon Sobal, Maksim Vaščanka i inšyja vydaŭcy. Budzie adznačany pieryjad ad kanca ChVIII stahodździa i da 20-ch hadoŭ XX stahodździa, kali biblijnyja knihi ŭ Biełarusi naohuł nie drukavalisia i kali na praciahu stahodździaŭ nie było zroblena nivodnaha pierakładu na biełaruskuju movu.
Lektar padrychtavaŭ multymiedyjnuju prezientacyju asob pierakładčykaŭ i pierakładaŭ i vystavu vydańniaŭ pierakładaŭ Biblii XX-XXI stahodździaŭ sa svajho ŭłasnaha zboru.
Akramia taho, u jakaści mastackaha supravadžeńnia imprezy dakładčyk abraŭ žyvapisnyja tvory mastaka Nasty Burko (adzin ź jaje tvoraŭ skarystany na vokładcy Mierapryjemstva) i muzyčnyja kampazicyi Natalli Nikicinaj, jakija vykanaje sama Natalla.
Ks. Siarhiej Surynovič maje hodnaść daktaranta biblistyki, źjaŭlajecca kandydatam navuk ahulnaha movaznaŭstva.
Lekcyja pačniecca 11 sakavika z 15.00.
Adras: pr.Dziaržynskaha, 57, pavierch 9, TUT.BY Gallery.