Lidar byłoha «Biełaha lehijona» Mirasłaŭ Łazoŭski zatrymany i źbity
Uviečary 21 sakavika ŭ mienskaj kvatery Mirasłava Łazoŭskaha adbyŭsia vobšuk. Jon pačaŭsia kala 20-j i tryvaŭ kala dźviuch hadzin. Sam Mirasłaŭ prysutničaŭ, jaho pryvieźli ludzi ŭ maskach, jon byŭ mocna źbity, paviedamiła Radyjo Svaboda siabroŭka Łazoŭskaha Nina Šydłoŭskaja.
Pavodle papiarednich źviestak, paśla pieratrusu Mirasłava Łazoŭskaha pavieźli ŭ śledčy izalatar Ministerstva ŭnutranych spraŭ na vuł. Vaładarskaha.
Mirasłaŭ Łazoŭski pracuje pamočnikam dyrektara vydaviectva «Knihazbor». Na pačatku 1990-ch jon byŭ adnym sa stvaralnikaŭ arhanizacyi «Bieły Lehijon». Siabry «Biełaha Lehijona» byli aktyŭnymi ŭdzielnikami ŭsich mitynhaŭ i šeściaŭ u 1996-1999 hadach. Arhanizacyja pracavała padpolna i spyniła svajo isnavańnie na pačatku 2000-ch.
Apošni raz uzhadki pra «Bieły Lehijon» źjavilisia ŭ 2008 hodzie, kali byłych kiraŭnikoŭ arhanizacyi Ihara Korsaka, Mirasłava Łazoŭskaha i Siaržuka Čysłava zatrymali pa spravie vybuchu 3-ha lipienia 2008 hoda, adnak u chutkim časie vyzvalili z-pad varty.
Na hetym tydni Łazoŭski paviedamiŭ, što jahony profil u fejsbuku byŭ uzłamany i nieviadomaja asoba ad jahonaha imia raspaŭsiudžvała infarmacyju pra padrychtoŭku da vuličnaj akcyi 25 Sakavika.
21 sakavika ŭ Miensku taksama byŭ zatrymany kniharaspaŭsiudnik Aleś Jaŭdacha. Incydent zdaryŭsia adrazu pa zakančeńni cyrymonii ŭznaharodžańnia laŭreataŭ litaraturnaj premii «Debiut» na vulicy Kastryčnickaj, kala siadziby tvorčaj prastory «CECH».