«Biełtelekam» bolš nie abjaŭlaje nadvorje pa-biełarusku
Paśla doŭhich majskich vychadnych prahnoz nadvorja pa numary 195 pačali ahučvać pa-rusku, choć dahetul słužba pracavała na biełaruskaj movie.
My źviarnulisia ŭ «Biełtelekam» z prośbaj patłumačyć, z čym źviazanyja źmieny.
«U suviazi sa źmianieńniem damoŭnych adnosin z Hidramietam i pryviadzieńniem pracy słužby 195 da adzinaha farmatu pa ŭsioj respublicy zapis infarmacyi ad 10 maja 2017 hoda robicca na ruskaj movie, što nie supiarečyć zakonu», — havorycca ŭ aficyjnym adkazie «Biełtelekama».
Pry hetym słužba 188, dzie možna daviedacca dakładny čas, pa-raniejšamu pracuje pa-biełarusku.
«Na biełaruskaj movie pracuje słužba 188 i častkova słužba 196 [kazki i pieśni dla dziaciej — NN]. Astatnija daviedačna-infarmacyjnyja słužby RUP «Biełtelekam» padajuć infarmacyju na ruskaj movie. Pierahlad farmatu vydačy infarmacyi na siońniašni dzień nie płanujecca», — kamientuje «Biełtelekam».
My taksama źviarnulisia pa kamientar u Hidramiet i čakajem aficyjny adkaz.