Viarchoŭny sud skaraciŭ terminy niekatorym fihurantam «Spravy 17-ci». Byłym siłavikam — na 6 hadoŭ
Viarchoŭny sud źmiakčyŭ prysud hałoŭnamu fihurantu našumiełaj «Spravy siamnaccaci» Kanstancinu Viluhu. Zamiest 20 hadoŭ, da jakich jaho prysudziŭ Minharsud, Viluha praviadzie ŭ kałonii ŭzmocnienaha režymu 19. Byłym supracoŭnikam pravaachoŭnych orhanaŭ termin skaročany na 6 hadoŭ.
Byłomu supracoŭniku KDB Dźmitryju Vieracienskamu termin pakarańnia skaročany z 15 hadoŭ da 9, jaho eks-kalehu Iharu Karyckamu — z 14 hadoŭ da 8. Były supracoŭnik MUS Kanstancin Dzienisievič taksama praviadzie ŭ kałonii ŭzmocnienaha režymu 8 hadoŭ zamiest 14. Terminy pakarańnia astatnich fihurantaŭ «Spravy siamnaccaci» zastalisia bieź źmieny.
Viarchoŭny sud vyklučyŭ z abvinavačańnia šerah epizodaŭ, źviazanych z raspaŭsiudžvańniem asoba niebiaśpiečnych rečyvaŭ, a taksama farmuloŭki «arhanizacyja złačynnaj hrupoŭki» i «pieravyšeńnie słužbovych paŭnamoctvaŭ».
Prysud ustupiŭ u siłu, adnak jon moža być abskardžany na praciahu troch hadoŭ u nahladnym paradku.
Nahadajem, Viarchoŭny sud pačaŭ razhladać apielacyjnyja skarhi na prysud pa «Spravie siamnaccaci» 26 maja. U skarhach abvinavačanyja prasili admianić prysud i adpravić spravu na novy razhlad, a to i zusim spynić. Na dumku Kanstancina Viluhi, kryminalnuju spravu raspačali biespadstaŭna, a śviedki boku abvinavačańnia usich ahavaryli.
Prysud abskardzili nie ŭsio — vyklučeńnie skłali Marat Bahiel (klučavy śviedka abvinavačańnia), a taksama Valeryj Strabkoŭ i Fiodar Artamonaŭ. Jany atrymali najmienšyja terminy - 2 hady pazbaŭleńnia i 4 hady abmiežavańnia voli biez nakiravańnia ŭ papraŭčuju ŭstanovu.
Nahadajem, Minski haradski sud vynies prysud pa «Spravie siamnaccaci» ŭ śniežni 2016 hoda. Hałoŭnamu fihurantu Kanstancinu Viluhu było pryznačana pakarańnie ŭ vyhladzie 20 hadoŭ pazbaŭleńnia voli va ŭmovach ŭzmocnienaha režymu. Byłym supracoŭnikam KDB — Dźmitryju Vieracienskamu — 15 hadoŭ ŭzmocnienaha režymu, a Iharu Karyckamu — 14 hadoŭ. Kanstancin Dzienisievič, u minułym supracoŭnik MUS, atrymaŭ 14 hadoŭ ŭzmocnienaha režymu.
Kanstancina Viluhu abvinavačvali ŭ stvareńni i kiraŭnictvie mižnarodnaj złačynnaj arhanizacyjaj, jakaja zajmałasia abarotam psichatropnych rečyvaŭ i niezakonnaj pradprymalnickaj dziejnaściu sa studzienia 2011 hoda pa listapad 2014 ha. Jaho ž abvinavačvali va ŭciahvańni ŭ niezakonnuju dziejnaść inšych hramadzian (astatnich abvinavačanych pa spravie), siarod jakich — ciapier užo byłyja pravaachoŭnik Kanstancin Dzienisievič z MUS, a taksama Dźmitryj Vieracienski i Ihar Karycki z KDB.