Biełaruski parłamient asudziŭ znos savieckich pomnikaŭ u Polščy
Kamisija pa mižnarodnych spravach Pałaty pradstaŭnikoŭ vystupiła suprać «apahańvańnia pamiaci savieckich sałdat i aficeraŭ, voinaŭ dziaržaŭ antyhitleraŭskaj kaalicyi». Zajava pryniataja na fonie rašeńnia Varšavy źnieści pomniki Čyrvonaj Armii, piša Tut.by.
Deputaty adznačyli, što, jak i ŭvieś narod, jany «śviata šanujuć pamiać našych suajčyńnikaŭ, jakija zahinuli na frantach Vialikaj Ajčynnaj vajny, abaraniajučy svaju Radzimu i śviet ad fašyzmu».
— Na žal, u apošni čas my ŭsio čaściej stanovimsia śviedkami apahanieńnia pamiaci savieckich sałdat i aficeraŭ, voinaŭ dziaržaŭ antyhitleraŭskaj kaalicyi, jakija canoj ułasnaha žyćcia prynieśli vyzvaleńnie narodaŭ Jeŭropy ad «karyčnievaj čumy» i adyhrali vyrašalnuju rolu ŭ Pieramozie nad fašyzmam. Źniščajucca i apahańvajucca pomniki i miemaryjały, miescy pachavańnia voinaŭ, jakija vyzvalali Jeŭropu ad nacysckaj akupacyi. Robiacca metanakiravanyja sproby pierapisvańnia historyi, hieraizacyi nacyzmu, skažeńnia i pierahladu vynikaŭ Druhoj suśvietnaj vajny.
U parłamiencie «rašuča asudzili» takija dziejańni i zajavili, što «lubyja sproby prasłaŭleńnia i adradžeńnia fašyzmu pavinny być spynienyja».
Deputaty taksama zaklikali ŭsie krainy śviata šanavać pamiać pra zahinułych u baraćbie z fašyzmam i padtrymlivać u naležnym stanie voinskija pachavańni, miemaryjały ŭ pamiać pra hierojaŭ i strašnyja padziei Druhoj suśvietnaj vajny.
Akramia taho, u parłamiencie zaklikali kaleh ź Jeŭropy abjadnać namahańni pa supraćdziejańni «sprobam adradžeńnia fašyzmu ŭ lubych jaho prajavach, supraćstajać apahanieńniu pamiaci sałdat i aficeraŭ, partyzan, bajcoŭ Supracivu, achviar Chałakosta, miljonaŭ ludziej, jakija addali svaje žyćci za vyzvaleńnie Jeŭropy ad fašyzmu».
Namieśnik staršyni Libieralna-demakratyčnaj partyi Aleh Hajdukievič paviedamiŭ u siabie ŭ fejsbuku, što mienavita ŁDP vystupiła ź inicyjatyvaj pryniać takuju zajavu ŭ parłamiencie paśla rašeńnia ab znosie pomnikaŭ u Polščy. Člen partyi Anatol Chiščanka ŭvachodzić u skład kamisii pa mižnarodnych spravach.
Raniej padobnyja zajavy pryniali Dziaržduma RF, Saviet kiraŭnikoŭ MZS ADKB i izrailski parłamient (Knesiet).
17 lipienia prezident Polščy Andžej Duda ŭchvaliŭ papraŭki ŭ zakon ab znosie pomnikaŭ savieckaj epochi, u tym liku miemaryjałaŭ u honar Čyrvonaj Armii. U krainie naličyli 469 pomnikaŭ, jakija nieabchodna źnieści.