Chto taki Nikoł Pašynian, jaki źmianiŭ uładu ŭ Armienii
Sustreča Nikoła Pašyniana (sprava) i Sierža Sarhsiana 22 krasavika doŭžyłasia ŭsiaho 3 chviliny. Sarhsian syšoŭ z zały paśla pieršaj ža zajavy Pašyniana, jaki zapatrabavaŭ ad jaho syści ŭ adstaŭku. Na nastupny dzień Sarhsian sydzie jašče raz — užo ŭ adstaŭku.
42-hadovy Nikoł Pašynian — prafiesijny žurnalist. Jon naradziŭsia ŭ nievialičkim horadzie Idževan i skončyŭ adździaleńnie žurnalistyki Jerevanskaha ŭniviersiteta ŭ 1995 hodzie. Užo ŭ 1999 hodzie papularny žurnalist staŭ redaktaram haziety «Ajkakan žamanak», jakaja aktyŭna krytykavała ŭładu prezidenta Robierta Kačarana.
U palityku Pašynian pryjšoŭ u 32 hady, u 2007 hodzie, kali ŭpieršyniu ŭziaŭ udzieł u vybarach u šerahach błoka «Impičmient», ale toj aljans nabraŭ tolki 1,29% hałasoŭ.
U 2008 hodzie Pašynian padtrymlivaŭ kandydata ŭ prezidenty (i eks-prezidenta) Lavona Ter-Pietrasiana. Tady paślavybarčaja baraćba pierarasła ŭ pierastrełki na vulicach Jerevana, ułady pratesty zdušyli, a jaje lidaraŭ, u tym liku Pašyniana, asudzili za arhanizacyju masavych biesparadkaŭ. Pašynianu dali 7 hadoŭ. Bolš za hod jon chavaŭsia, pierš čym zdacca palicyi. U turmie jon pravioŭ dva hady, paśla čaho vyjšaŭ na svabodu pa amnistyi. I ŭžo praz hod, u 2012-m, staŭ deputatam parłamienta pa partyjnym śpisie Armianskaha nacyjanalnaha kanhresu — staroj partyi, anałaha našaha Narodnaha frontu. U 2015-m Pašynian stanovicca suzasnavalnikam novaj partyi, a ŭ 2017-m jahony «Jełk», ci to «Vyjście», akazvajecca adzinaj apazicyjnaj palityčnaj siłaj, što prajšła ŭ parłamient. Pavodle źviestak armianskaha CVK, partyja nabrała ścipłyja 7% hałasoŭ.
Pašynian udzielničaje i ŭ vybarach mera Jerevana: atrymlivaje, pavodle aficyjnych źviestak, usiaho 22%.
«Jełk» — samaja prajeŭrapiejskaja palityčnaja siła ŭ Armienii.
I mienavita Pašynian, u kamuflažnaj formie, ustaŭ na čale pratestaŭ, jakija zmusili syści niaźmianialnaha Sierža Sarhsiana. Varta adznačyć, što, kali Pašyniana aryštavali, z trybuny mitynhu pratestoŭcami kiravała jahonaja žonka.
Pratesty ŭ Armienii byli padkreślena mirnymi i niehvałtoŭnymi.
U svaim vystupie 23 krasavika Pašynian padkreśliŭ, što ŭ armianskaj aksamitnaj, biaskroŭnaj revalucyi niama nijakaha hieapalityčnaha kantekstu.
Armienija abapirajecca na Rasiju, budučy atočanaja z troch bakoŭ musulmanskimi krainami i znachodziačysia ŭ stanie faktyčnaj vajny z Azierbajdžanam, blizkim sajuźnikam Turcyi.
ZŠA zajavili pra hatoŭnaść pracavać z novym uradam.
Rasijskija ŚMI pra padziei ŭ Jerevanie paviedamlajuć minimalna.
{POLL#744}