«Novy čas»: U budaŭnictvie «Pajedziem, pajadzim» prysutničaje rasijski śled
Vydańnie «Novy Čas» paviedamlaje, što niepasrednuju datyčnaść da pabudovy kompleksu «Pajedziem, pajadzim» maje kampanija z Rasii, a taksama jość infarmacyja pra mažlivych łabistaŭ ułaśnikaŭ abjekta na vyšejšym dziaržaŭnym uzroŭni.
Rasijski śled
Kampanija STAA «BiełRestInviest» była, mierkavana, admysłova stvorana dla realizacyi prajektu pabudovy zabaŭlalnaha kompleksu «Bulbaš-choł» u achoŭnaj zonie nacyjanalnaha miemaryjału «Kurapaty». Nahadajem, 50% kampanii naležyć STAA «KvartałMZS», 33,3% — amierykanskaj kampanii z abmiežavanaj adkaznaściu Lenthon Realty LLC i astatnija 16,7% — zakrytaj akcyjaniernaj kampanii z abmiežavanaj adkaznaściu Bealcy Investments Ltd., zarehistravanaj na Kipry. Ale chto źjaŭlajecca bienieficyjaram asnoŭnaha ŭłaśnika kampanii «BiełRestInviest» — STAA «KvartałMZS»?
Zhodna z dadzienymi z Adzinaha dziaržaŭnaha rehistru jurydyčnych asobaŭ i pradprymalnikaŭ Biełarusi (ADR), kampanija STAA «KvartałMZS» zarehistravanaja 20 maja 2004 hoda Minskim harvykankamam sa statutnym kapitałam 39 200 dołaraŭ ZŠA. Asnoŭnym vidam dziejnaści źjaŭlajecca ahulnaja pabudova budynkaŭ. Jurydyčny adras kampanii — Minsk, zavułak Kazłova, 5a, ofis 3a, tam ža mieścicca i kampanija «BiełRestInviest». Kiraŭnikom z 15 lutaha 2006 hoda źjaŭlałasia Łohvin Volha Vitaleŭna, na hety momant jana ŭznačalvaje kampaniju TAA «KvartałMZS-Bud» i da siońnia praciahvaje zajmacca spravavodstvam «BiełRestInviestu». Ułaśnikami kampanii źjaŭlajucca: Zajdes Leanid Lejbavič (37,25%) i ZAT «Rieniessans» (62,75%), zarehistravanaja ŭ Rasijskaj Fiederacyi.
Takim čynam, majecca dakumientalnaje śviedčańnie, što da realizacyi prajektu pabudovy zabaŭlalnaha kompleksu «Bulbaš'-choł» u achoŭnaj zonie miemaryjału «Kurapaty», maje dačynieńnie rasijskaja kampanija. Joj naležyć bolšaja častka kampanii «KvartałMZS», praź jakuju jana kantraluje «BiełRestInviest», ź jakim pad hety kompleks układziena damova arendy 1,2 ha ziamli ažno da 2106 hoda.
Možna vykazać zdahadku, što kampanija «BiełRestInviest» — svojeasablivy taran, z dapamohaju jakoha ŭdałosia skončyć pabudovu i adkryć sumnaviadomy kompleks. Heta zrazumieła praz łohiku ŭklučeńnia ŭ skład jaje ŭłaśnikaŭ kampanij Lenthon Realty LLC i Bealcy Investments Ltd (padrabiazna pra heta dalej).
Pavodle dadzienych z rasijskaha adzinaha dziaržaŭnaha rejestru jurydyčnych asobaŭ, ZAT «Rieniessans» stvoranaje 16 vieraśnia 2002 hoda ŭ Sankt-Pieciarburhu i rearhanizavanaje 29 vieraśnia 2014 hoda sa stvareńniem adnajmiennaj novaj jurydyčnaj asoby ŭ formie TAA. Asnoŭnym vidam dziejnaści źjaŭlajucca ŭkładańni ŭ kaštoŭnyja papiery. Kampanija maje jak minimum piać filijaŭ, hienieralnym dyrektaram TAA «Rieniessans» źjaŭlajecca fihurant našaha pieršaha rasśledavańnia — Barys Surys. Stopracentnym ułaśnikam TAA «Rieniessans» jość kampanija «Tebridge Holding Corp» (ras. «Tiebridž Chołdinh Korp.»). U adkrytych krynicach infarmacyi dadzienyja pra jaje praktyčna adsutničajuć. Pavodle Hramadskaha rejestru Panamy, kampanija zarehistravanaja 21 listapada 2013 hoda sa statutnym kapitałam u 10 tysiač dołaraŭ ZŠA.
U kiraŭničym składzie kampanii pieraličanyja asoby, kožnaja ź jakich fihuruje ŭ rehistracyjnych dadzienych jašče bolš za tysiaču kampanij.
Heta tak zvanyja «proksi-ŭdzielniki», nieabchodnyja tolki dla rehistracyi afšornaj kampanii. Na hety momant dakładna nie viadoma, chto za joj staić.
Znoŭ «KvartałMZS-Bud»
Praz rearhanizacyju kampanii STAA «KvartałMZS» była stvoranaja novaja jurydyčnaja asoba — TAA «KvartałMZS-Bud» — mierkavana, admysłova dla budaŭnictva ŭ 2014 hodzie žyłoha kompleksu «Parkavy» ŭ zialonaj zonie minskaha mikrarajona Masiukoŭščyna. Vydańnie «Novy Čas» vykazała zdahadku, što hetaja kampanija maje niepasrednaje dačynieńnie da «Hrupy kampanijaŭ «IV».
U vypisie z ADR paznačanaje, što TAA «KvartałMZS-Bud» zarehistravanaja 30 śniežnia 2011 hoda Minskim harvykankamam i stvoranaja ŭ vyniku rearhanizacyi praz vyłučeńnie z kampanii STAA «KvartałMZS». Jurydyčny adras stvoranaj kampanii — Minsk, vuł. Kazłova, 7b, pakoj 300 (budynak kampanii «IV»). Hałoŭnym vidam dziejnaści źjaŭlajecca nabyćcio i prodaž ułasnaj nieruchomaj majomaści.
Statutny fond składaje ŭsiaho 10 (!) biełaruskich rubloŭ. Ułaśnikami «KvartałMZS-Bud» źjaŭlajucca: Sinickaja Maryna Alehaŭna (50%) i TAA «KorpKansałt-Inviest» (50%).
Kiraŭnikom kampanii, jak było skazana vyšej, z 5 červienia 2014 hoda źjaŭlajecca Łohvin Volha Vitaleŭna. U svaju čarhu, kampanija TAA «KorpKansałt-Inviest», pavodle vypisaŭ z ADR, naležyć Izraileviču Arkadziu Lvoviču (50%) i Vialickamu Alaksandru Vładlenaviču (50%).
Zhodna z p.4 art.54 Hramadzianskaha Kodeksu RB, padčas vyłučeńnia sa składu jurydyčnaj asoby adnoj ci niekalkich jurydyčnych asobaŭ kožnaj ź ich pavodle padzialalnaha bałansu pjerachodziać pravy i abaviazki rearhanizavanaj jurydyčnaj asoby. Atrymlivajecca, što Arkadź Izrailevič praz afilavanyja ź im kampanii maje suviaź z zabudoŭnikami zabaŭlalnaha kompleksu «Bulbaš-choł».
Kipr? Rasija? Biełaruś?
Adnoj z kampanijaŭ, pra ŭłaśnikaŭ jakoj dahetul nie było vyjaŭlena anijakaj infarmacyi, jość Bealcy Investments Ltd. Hetaj tajamničaj kiprskaj kampanii naležać 14,5% TAA «Biełnavateks hrup» i 16,7% STAA «BiełRestInviest» — daččynaj kampanii STAA «KvartałMZS». Z dapamohaju vyviedki adkrytych krynic infarmacyi (OSINT) i dadzienymi z ADR my pasprabavali vyznačyć afilavanyja z kampanijaj Bealcy Investments Ltd. struktury i asoby. U vyniku była vyjaŭlenaja infarmacyja, jakaja śviedčyć pra vierahodnaść łabijavańnia na vyšejšym dziaržaŭnym uzroŭni ŭsich pytańniaŭ, źviazanych z pabudovaj u achoŭnaj zonie Kurapataŭ zabaŭlalnaha kompleksu i jaho siońniašniaj dziejnaściu.
Va ŭsich vypisach z ADR hetaja kampanija fihuruje jak Zakrytaja akcyjaniernaja kampanija z abmiežavanaj adkaznaściu «Biłsi Inviestmients Limitied» z kiprskim rehistracyjnym numaram 227109. Zhodna z dadzienymi handlovaha rejestru Kipra, jana zarehistravanaja 9 krasavika 2008 hoda. Pa infarmacyi Ministerstva justycyi Biełarusi, na terytoryi našaj krainy byli zarehistravanyja dźvie kampanii z nazvaj «Biłsi»: TAA «Biłsi-Ryełt» i STAA «Biłsi». Pieršaja kampanija zarehistravanaja Minskim harvykankamam 25 červienia 2013 hoda i stvoranaja ŭ vyniku rearhanizacyi praz vyłučeńnie z Tavarystva z abmiežavanaj adkaznaściu «Biełtranśfier». Jurydyčny adras TAA «Biłsi-Ryełt» — Minsk, zavułak Kazłova, 7/h, pakoj 303 (budynak kompleksu administratyŭnych pabudovaŭ kampanii «IV»). Asnoŭny vid dziejnaści «Biłsi-Ryełt» — zdača ŭ arendu ŭłasnaj nieruchomaj majomaści. Pavodle vypisu z ADR, jaje ŭłaśnikami z 4 žniŭnia 2014 hoda źjaŭlajucca hramadzianka RB Biekbułatava Kaciaryna Leanidaŭna (1%) i kiprskaja «Bealcy Investments Ltd.» (99%). Taksama z 25 červienia 2013 hoda pa 4 žniŭnia 2014 hoda ŭłaśnikami kampanii byli hramadzianie RB: Azaranka Viačasłaŭ Michajłavič i Azaranka Łarysa Ivanaŭna.
15 krasavika 2015 hoda «Biłsi-Ryełt» spyniła svaju dziejnaść u suviazi z rearhanizacyjaj u formie dałučeńnia da kampanii STAA «Biłsi».
Sumiesnaje tavarystva z abmiežavanaj adkaznaściu «Biłsi» zarehistravana Minskim harvykankamam 7 kastryčnika 2008 hoda. Jaho ŭłaśnikami źjaŭlajucca tyja ž asoby, što i dałučanaj da jaje kampanii «Biłsi-Ryełt» — Kaciaryna Biekbułatava i «Bealcy Investments Ltd.». Roźniacca tolki ich doli — 75% i 25% adpaviedna.
Asnoŭnym vidam dziejnaści kampanii taksama źjaŭlajecca nadańnie ŭ arendu ŭłasnaj nieruchomaj majomaści. Charakterna, što padčas rehistracyi była paznačanaja elektronnaja pošta (potockaya@sagmel.by) z damiennym imiem siervieru farmaceŭtyčnaj karparacyi «SagMel Inc.», jakaja raniej naležała Laonu Sahalčyku i Antonu Mielichavu.
Charakterna, što elektronnuju poštu dla kantaktaŭ z hetym ža damiennym imiem (medvedska@sagmel.by) paznačyła i kampanija TDA «Biełtranśfier», ź jakoj była vyłučanaja «Biłsi-Ryełt». Hetaja «maciarynskaja» kampanija zajmajecca dystrybucyjaj farmaceŭtyčnaj i parfumava-kaśmietyčnaj pradukcyi. U šmatlikich handlovych bazach dadzienych padadzieny kantaktny adras kampanii — Minsk, zavuł. Kazłova, 7/h-102, — znoŭ budynak kampanii «IV». U hetym ža budynku, u jakim mieściłasia i kampanija «Biłsi-Ryełt», u pakoi 404a znachodziłasia i pradstaŭnictva farmaceŭtyčnaj karparacyi «SagMel» u Biełarusi, potym pradadzienaj kampanii Bayer HealthCare i likvidavanaj ułaśnikam 1 žniŭnia 2017 hoda.
Cikava, što pavodle zapisaŭ z handlovaha rejestru ad 31 sakavika 2015 hoda, u susiednim pakoi 401a zarehistravany abjekt aptovaha handlu zamiežnaha handlovaha ŭnitarnaha pradpryjemstva — «Biełtranśfier-Mied». U rejestry ŭłaśnikaŭ mytnych składoŭ na terytoryi Biełarusi, a taksama ŭ katałohu biełaruskich arhanizacyjaŭ i admysłoŭcaŭ u śfiery achovy zdaroŭja padadziena adna z raniejšych poŭnych nazvaŭ kampanii — Zamiežnaje pryvatnaje ŭnitarnaje pradpryjemstva aptovaha handlu «Biełtranśfier-Mied» kampanii «Sahmieł, Ink».
Hetaja, mažliva, daččynaja struktura kampanii «Biełtranśfier» zajmajecca realizacyjaj farmaceŭtyčnych i miedyčnych tavaraŭ i preparataŭ. Z ulikam hetaj infarmacyi, zrazumieła, što ŭsie pieraličanyja vyšej kampanii źviazanyja pamiž saboj i afilavanyja, mierkavana, z kolišnimi ŭłaśnikami amierykanskaj farmaceŭtyčnaj karparacyi «SagMel» Laonam Sahalčykam i Antonam Mielichavym.
Kampanija «Biełtranśfier» ździajśniaje svaju dziejnaść nie tolki na terytoryi Biełarusi, ale i va Ukrainie. Na sajcie Ministerstva ekanamičnaha raźvićcia i handlu Ukrainy jość infarmacyja pra zadziejničańnie ŭ dačynieńni da jaje jašče ŭ 1999 hodzie sankcyjnaha režymu. Taksama viadoma, što mierkavanaja mahiloŭskaja filija kampanii — «Biełtranśfier MH» — była likvidavanaja i vyklučanaja z ADR Biełarusi ŭ 1997 hodzie praz ździajśnieńnie dziejnaści biez adpaviednaj licenzii.
Biźnies pa-siabroŭsku
Hienieralnym dyrektaram TDA «Biełtranśfier» i adnym ź pieršych ułaśnikaŭ TAA «Biłsi-Ryełt» źjaŭlajecca Azaranka Viačasłaŭ Michajłavič. Naradziŭsia ŭ 1964 hodzie, mierkavana ŭ Mahilovie, maje hramadzianstva Rasii. Zajmaŭsia lohkaj atletykaj, u adkrytych krynicach zachoŭvajucca dadzienyja pra spartovyja vyniki jaho ŭdziełu ŭ Jełhaŭskim marafonie ŭ 1988 hodzie. Biełaruskaje pradstaŭnictva kampanii «SagMel», vice-prezidentam jakoj jon byŭ, u siaredzinie 2000-ch hadoŭ dapamahała mahiloŭskaj spartovaj škole. Aproč hetaha pradstaŭnictva ŭ tyja časy vystupała adnym z arhanizataraŭ štohadovych prabiehaŭ u Mahilovie na pryzy čempijonu SSSR pa marafonie Viktara Mazhavoha, pieramožcaŭ jakich Azarenka ŭznaharodžvaŭ asabista.
Paznačany padčas dziaržaŭnaj rehistracyi kantaktny telefon STAA «Biłsi» (8017 301-91-45) taksama vykarystoŭvaje pradpryjemstva TAA «Fartyva Mied». Mierkavana, heta jašče adzin aktyŭ Sahalčyka, Mielichava i Azaranki. Heta ŭskosna paćvierdžana praz udzieł u 2015 hodzie Viačasłava Azaranki ŭ dziełavoj prahramie pieršaj mižnarodnaj vystavy «Expo-Russia Belarus 2015» i pieršaha Minskaha biźnies-forumu ŭ jakaści pradstaŭnika kampanii «Fartyva Mied». Kruhły stoł byŭ arhanizavany supolna ź Ministerstvam achovy zdaroŭja RB i mieŭ nazvu «Pra praviadzieńnie ŭzhodnienaj palityki ŭ śfiery achovy zdaroŭja ŭ miežach realizacyi Kancepcyi sacyjalnaha raźvićcia Sajuznaj dziaržavy Rasii i Biełarusi». Varta zaznačyć, što na hetuju kanfierencyju była zaprošanaja abmiežavanaja kolkaść pradstaŭnikoŭ biełaruskich pryvatnych farmaceŭtyčnych kampanij.
Admietna, što Viačasłaŭ Azaranka aproč rasijskaha, całkam mažliva, maje hramadzianstva ZŠA. Śpiecyjalizavanyja pošukavyja i ryełtarskija siervisy paznačajuć adno ź jaho miescaŭ žycharstva va ŭłasnym domie siamji Laona Sahalčyka ŭ pradmieści Čykaha pa adrasie: 691 Wake Robin Ln, Highland Park, Lake County, Il 60035 (1, 2, 3).
Dvuchpaviarchovy muravany dom, zbudavany ŭ 2008 hodzie, maje piać spalniaŭ, dva kaminy, haraž i padziemny basiejn. Ahulnaja płošča składaje pryblizna 1,34 akry, rynkavy košt domu kala 3 miljonaŭ dołaraŭ. Nadańnie Laonam Sahalčykam prytułku Viačasłavu Azaranku moža śviedčyć pra toje, što jany majuć nie tolki dziełavyja stasunki, ale i ščylnyja siabroŭski suviazi. Šmat ich abjadnoŭvaje i z Antonam Mielichavym — pieradusim praz kampaniju «SagMel, Inc.» i mierkavanyja supolnyja paznačanyja vyšej aktyvy ŭ Biełarusi. Aproč hetaha z dapamohaju kancylaryi amierykanskaha štatu Ilinojs było vyznačana, što ŭsie troje źjaŭlajucca ŭłaśnikami jašče adnoj zarehistravanaj kampanii ŭ ZŠA — Polaris Investment LLC.
Hetyja asoby majuć aktyvy i ŭ Rasijskaj Fiederacyi. Viačasłaŭ Azaranka źjaŭlajecca kiraŭnikom i adzinym ułaśnikam inviestycyjnaj kampanii TAA «Art-inviest hrupp», zarehistravanaj 11 vieraśnia 2008 hoda ŭ Maskvie. Asnoŭny vid dziejnaści kampanii — padrychtoŭka da prodažu ŭłasnaj nieruchomaj majomaści, aproč hetaha jana zajmajecca aptovym handlem nasieńniem i zierniem. «Art-inviest hrupp» aktyŭna pracuje na rynku žyłoj nieruchomaści Maskoŭskaj vobłaści. Źjaŭlajecca zabudoŭnikam žyłych kompleksaŭ u padmaskoŭnych haradach Ivanciejeŭka, Puškina. Admietna, što kantaktny telefon kampanii «Art-inviest hrup» raniej naležaŭ daččynaj struktury karparacyi «SagMel, Inc.» u RF.
«Art-inviest hrup» maje skrajnie niehatyŭnyja acenki na šmatlikich partałach vodhukaŭ pra dziejnaść pracadaŭcaŭ. Charakterna, što jana fihuruje tam taksama ź inšaj nazvaj — «AhroPromSiervis».
Pavodle infarmacyi z Adzinaha dziaržaŭnaha rejestru jurydyčnych asobaŭ RF (ADRIUA), TAA «AhroPromSiervis» zarehistravanaja 5 lutaha 2015 hoda ź jurydyčnym adrasam u h. Krasnahorsku Maskoŭskaj vobłaści. Statutny kapitał składaje 10 tysiač rasijskich rubloŭ. Kampanija stvoranaja praz rearhanizacyju z adnajmiennaha zakrytaha akcyjaniernaha tavarystva, adnym ź pieršych hienieralnych dyrektaraŭ jakoha byŭ mienavita Viačasłaŭ Azaranka. Zasnavalnikami rearhanizavanaj kampanii stali Zakrytaja akcyjaniernaja kampanija z abmiežavanaj adkaznaściu «Crowfoot Trading Limited» (90%), a taksama (uvaha!) — «Bealcy Investments Limited» (10%).
Abiedźvie kampanii zarehistravanyja na Kipry ź identyčnym jurydyčnym adrasam: Agiou Pavlou Str, 15, Ledra House, Agios Andreas 1105, Nicosia, Cyprus. Jość i cikavaja asablivaść: «Crowfoot Trading Limited» razam z amierykanskaj kampanijaj «Lenthon Realty LLC» u jakaści nierezidentaŭ viali haspadarčuju dziejnaść u Biełarusi. Abiedźvie byli zarehistravanyja Ministerstvam pa padatkach i zborach RB u adzin dzień — 1 śniežnia 2010 hoda. Amal praz čatyry z pałovaj hady, u adzin u toj ža dzień, 27 krasavika 2015 hoda, ich rehistracyja była skasavanaja (1, 2, padrabiaznaja infarmacyja pra «Lenthon Realty LLC» majecca ŭ našym pieršym rasśledavańni).
Hetyja fakty śviedčać pra toje, što jany źviazanyja miž saboj i, mierkavana, afilavanyja ź Laonam Sahalčykam, Antonam Mielichavym i, mažliva, Viačasłavam Azarankam. Z ulikam padadzienaha masivu infarmacyi zrazumieła, što jany padtrymlivajuć na praciahu vielmi vialikaha pramiežku času doŭhatryvałyja partniorskija znosiny, źjaŭlajucca ŭłaśnikami supolnych kampanijaŭ, aktyvaŭ u roznych dziaržavach. Vidavočna, ź vialikaj dolaj vierahodnaści, kampanija «Bealcy Investments Ltd.» taksama afilavanaja z hetymi asobami, utvoranaja ź jaje ŭdziełam TAA «Biłsi-Ryełt» praz rearhanizacyju ŭ formie vyłučeńnia z kampanii TDA «Biełtranśfier» pra heta jaskrava śviedčyć. Pradstaŭnikom ich intaresaŭ u Biełarusi, a taksama ŭłaśnikam STAA «Biłsi», jak było zaznačana napačatku, źjaŭlajecca Biekbułatava Kaciaryna Leanidaŭna (nar. u 1970 hodzie, žyła ŭ Minsku).
Rasijskaja sistema elektronnaha dakumientazvarotu i pravierki kontrahientaŭ «ŚBIS» na padstavie infarmacyi ź Fiederalnaj padatkovaj słužby RF i z ulikam historyi źmienaŭ padaje infarmacyju pra najaŭnaść suviaziaŭ «Art-inviest hrupp» z kampanijaj TAA «HieliOjł», zarehistravanaj 15.10.2010 h. u Maskvie. «HieliOjł» naležyć tolki adnamu ŭłaśniku — kiprskaj kampanii «Iliotropion Trade & Service Ltd.». Pavodle infarmacyi z handlovaha rejestru Kipru, apošniuju kampaniju ačolvaje (uvaha!) — Kaciaryna Biekbułatava (1, 2). Asnoŭnym vidam dziejnaści kampanii źjaŭlajecca vytvorčaść naftapraduktaŭ, bolšaść ža dadatkovych vidaŭ dziejnaści, pieradusim aptovy handal nasieńniem i zierniem, — tyja ž samyja, što i ŭ «Art-inviest hrup». Vidavočna, Biekbułatava maje ščylnyja partniorskija stasunki i supolnyja biźnies-intaresy ź Viačasłavam Azarankam.
U vyniku analizu adkrytych krynic infarmacyi i z ulikam mizernaj kolkaści nośbitaŭ proźvišča «Biekbułataŭ» u Biełarusi, vyznačana, što Kaciaryna Biekbułatava, ź vialikaj dolaj vierahodnaści, źjaŭlajecca ci była žonkaju viadomaha biełaruskaha chakieista Vadzima Biekbułatava.
Biźnies praz sport?
Biekbułataŭ Vadzim Mikałajevič — zasłužany majstar sportu Respubliki Biełaruś. Naradziŭsia ŭ 1970 hodzie ŭ Minsku (pavodle inšych dadzienych, u Śviardłoŭsku). Udzielnik chakiejnaj zbornaj Biełarusi na zimnich Alimpijskich hulniach 1998 hoda ŭ Nahana i 2002 hoda ŭ Sołt-Lejk-Sici. Za nacyjanalnuju zbornuju Biełarusi vystupaŭ z 1992 pa 2005 hod. Źjaŭlajecca kapitanam chakiejnaj «Kamandy prezidenta Respubliki Biełaruś».
Skrynšot videa tielekanału «STV»
Hulaje ŭ joj ad 2005 hoda razam z Alaksandram Łukašenkam. Kamanda stała pieramahaje ŭ štohadovym Kaladnym mižnarodnym turniry siarod amataraŭ chakieju na pryz svajho ž kiraŭnika, i heta nie dziŭna, bo bolšaść jaje hulcoŭ — prafiesijnyja chakieisty sa šmathadovym stažam. Pa-za hetym turniram kamanda Łukašenki hulaje ŭ Respublikanskich spabornictvach pa chakiei z šajbaj siarod amataraŭ, u jakaści sparynh-partnioraŭ u ich vystupajuć zbornyja biełaruskich abłaściej. Aproč hetaha, Biekbułataŭ razam sa staršym synam kiraŭnika Biełarusi Viktaram Łukašenkam (pamočnikam kiraŭnika Biełarusi pa nacyjanalnaj biaśpiecy, čalcom Rady Biaśpieki) i siarednim — Dźmitryjem Łukašenkam — staršynioj centralnaj rady «Prezidenckaha spartovaha kłubu», vystupaje ŭ amatarskim čempijanacie Minsku za družynu pamiežnych vojskaŭ «Rubiež». Mienavita ŭ Pamiežnych vojskach prachodzili terminovuju słužbu Viktar i Dźmitryj Łukašenki.
U 2014 hodzie Łukašenka ŭznaharodziŭ Vadzima Biekbułatava Ordenam Pašany (1, 2). Charakterna, što kiraŭnik Biełarusi ŭhanaravaŭ jaho asabista padčas aficyjnaha pryjomu, na jakim byli ŭznaharodžanyja staršynia KDB Valer Vakulčyk, ministr unutranych spravaŭ Ihar Šunievič, tahačasny ministr abarony Jury Žadobin, staršynia CVK Lidzija Jarmošyna.
U adkrytym dostupie niašmat infarmacyi pra asabistaje žyćcio Vadzima Biekbułatava. Pavodle jaho asabistaha śviedčańnia, zroblenaha padčas adnaho ź niešmatlikich intervju, jon dapamahaŭ svajmu synu, jaki navučaŭsia ŭ ZŠA. U akaŭncie sacsietki «OK» Kaciaryny Biekbułatavaj jość źviestki, što ich mierkavany supolny syn Mikita nasamreč navučaŭsia i skončyŭ u 2016 hodzie pryvatny ryma-katalicki ŭniviersitet Markieta (Marquette University) u Miłuoki, štat Viskonsin.
Vyniatak z ankiety M. Biekbułatava
U apisańni svajho dośviedu pracy ŭ akaŭncie Linkedin jon paznačyŭ, što sa studzienia pa śniežań 2015 hoda byŭ mieniedžaram pa raźvićci biźniesu čykahskaj kampanii «Slice the Price Electronics», jakaja praisnavała krychu bolš za hod. Charakterna, što adras ahienta, jaki ździajśniaje rehistracyju kampanii, całkam supadaje z adrasam karparacyi «SagMel, Inc.» Sahalčyka i Mielichava. Ułaśnikami kampanii «Slice the Price Electronics» źjaŭlaŭsia sam Mikita Biekbułataŭ i, mierkavana, syn Viačasłava Azaranki.
Paśla atrymańnia vyšejšaj adukacyi ŭ ZŠA Mikita Biekbułataŭ pracuje ŭ rasijskaj kampanii «AhroPromSiervis», ułaśnikam i dyrektaram jakoj źjaŭlajecca Viačasłaŭ Azaranka.
Mikita Biekbułataŭ / Linkedin
Pakazalna, što dla svajoj elektronnaj pošty jon vykarystoŭvaje karpatyŭnaje damiennaje imia kampanii «Art-Inviest hrupp», što dadatkova śviedčyć pra ŭzajemasuviaź dźviuch kampanijaŭ.
U zhadanym akaŭncie Linkedin jon paznačyŭ svaju pasadu ŭ kampanii «AhroPromSiervis» u jakaści «mieniedžara pa ekspartu». U adkrytym dostupie byŭ znojdzieny suśvietny katałoh aptovych pastaŭnikoŭ ziernia «The Grain Book» za 2016 hod. Cikava, što Mikita Biekbułataŭ razam ź Viačasłavam Azarankam pradstaŭlajuć u im nie svaju rasijskuju kampaniju, ale paznačanuju vyšej afšornuju kiprskuju kampaniju «Iliotropion Trade & Service Ltd», jakuju, pavodle rehistracyjnych dakumientaŭ, ačolvaje jaho maci — Kaciaryna Biekbułatava.
Takim čynam, Mikita Biekbułataŭ, jak i jaho maci, staŭsia paŭnavartasnym partnioram Viačasłava Azaranki. Vierahodna, dla vyrašeńnia prablemaŭ, jakija paŭstajuć padčas ździajśnieńnia biźniesu ŭ Biełarusi, jon razam sa svajoj maci maje mažlivaść naŭprost źviartacca da Vadzima Biekbułatava, jaki stała i rehularna na praciahu dosyć vialikaha pramiežku času sustrakajecca ź pieršymi asobami dziaržavy.