Kupała prychodzić u redakcyju «Našaj Nivy» i vitajecca z redaktaram — u Trajeckim prajšli zdymki dramy pra pieśniara FOTY
Pieršyja sceny poŭnamietražnaha filma Uładzimira Jankoŭskaha pad nazvaj «Kupała» pačali zdymać jašče ŭ lipieni 2018 hoda.
Rolu Janki Kupały vykonvaje Mikałaj Šestak. Akcior žyvie i pracuje ŭ Ryzie, ale maje biełaruskija karani — jaho baćka naradziŭsia ŭ Biełarusi. Scenarystkaj stužki źjaŭlajecca Alena Kalunova.
Na zdymačnaj placoŭcy ŭ Trajeckim pradmieści 25 lutaha zdymali sceny ŭvachodu Janki Kupały ŭ redakcyju «Našaj Nivy» ŭ Vilni. Śpiecyjalna dla hetaha amal na ŭvieś dzień była pierakryta Staravilenskaja vulica.
Pa zadumcy stvaralnikaŭ filma, Kupała na ŭvachodzie ŭ redakcyju pierakidvajecca słovam z supracoŭnikam haziety. Na hetuju epizadyčnuju rolu byŭ zaprošany ciapierašni redaktar «Našaj Nivy» Jahor Marcinovič. U kinavytvorčaści hety pryjom nazyvajuć «kamiea».
Stužku płanujuć skončyć da kanca 2019 hoda, a sam prajekt maje status nacyjanalnaha.