Navukoŭcy vyličyli masu Mlečnaha Šlachu
Jeŭrapiejskamu kaśmičnamu ahienctvu (JEKA) udałosia vyznačyć prybliznuju masu Mlečnaha Šlachu — heta značyć Hałaktyki, u jakoj znachodzicca Ziamla, Soniečnaja sistema i ŭsie bačnyja niaŭzbrojenym vokam zorki. Pavodle dadzienych navukoŭcaŭ, raźlikovaja masa roŭnaja 1,5 trłn soniečnych mas. Pra heta havorycca ŭ raspaŭsiudžanaj JEKA ŭ čaćvier zajavie.
Vyličeńni byli ažyćcioŭleny na asnovie abjadnańnia dadzienych, atrymanych ad misii teleskopa ESA Gaia i nazirańniaŭ, praviedzienych z dapamohaj kaśmičnaha teleskopa Hubble. Papiarednija vyličeńni, praviedzienyja astranomami roznych krain, pakazali na masy ad 500 młrd da 3 trłn mas Sonca. Jak adznačajecca ŭ zajavie JEKA, takoje mocnaje adroźnieńnie ŭ acenkach «ŭ asnoŭnym źviazana z roźnicaj u mietadach vyličeńni raźmierkavańnia ŭ Hałaktycy ciomnaj materyi, na jakuju prypadaje 90% jaje masy».
Pakolki ciomnaja materyja nie vypuskaje elektramahnitnaha vypramieńvańnia i naŭprost nie ŭzajemadziejničaje ź im, heta ŭskładniaje abo navat robić niemahčymym jaje pramoje nazirańnie.
Niepasredna masa płaniet składaje tolki nievialikuju častku masy Mlečnaha Šlachu, adznačajuć astranomy JEKA. Jany paviedamlajuć, što ŭ hetaj suviazi vyličeńni byli imi zrobleny mietadam, zasnavanym na vymiareńni chutkaściaŭ šaravych navał — ščylnych zornych hrup, jakija kruciacca vakoł śpiralnaha dyska Hałaktyki na vialikim ad jaho addaleńni.