Rasijskija ŚMI paviedamili novuju viersiju vybuchu pad Sievieradźvinskam
Vybuch, jaki adbyŭsia ranicaj 8 žniŭnia na vajennym palihonie pad Sievieradźvinskam (Archanhielskaja vobłaść), adbyŭsia ŭ chodzie vyprabavańnia «pierśpiektyŭnaha paskaralnika» na vadkasnym rakietnym ruchaviku z «atamnaj batarejkaj» i nie źviazany z rabotami pa rakiecie «Buravieśnik», śćviardžajuć rasijskija «Iźviestija».
Mahčymaści pravieryć hetuju viersiju «Iźviestij» niama.
Hazieta, spasyłajučysia na krynicy ŭ Minabarony Rasii, dvuch surazmoŭcaŭ u abaronna-pramysłovym kompleksie i ekśpiertaŭ, piša, što takaja «atamnaja batarejka» pryznačana dla zamieny tradycyjnaha akumulatara, jaki zabiaśpiečvaje termastatyčnaść (pastajannuju tempieraturu paliva, akiślalnika i ŭsich sistem paskaralnika) i inicyjacyju (mikravybuch paśla źmiešvańnia kampanientaŭ paliva) ruchavika.
Raniej paviedamlałasia, što incydent, jaki zdaryŭsia na ŭźbiarežžy Biełaha mora, moža być źviazany z vyprabavańniami elemientaŭ pierśpiektyŭnaj hipierhukavaj rakiety «Cyrkon» abo ź nizkalotnaj małazaŭvažnaj kryłataj rakietaj hłabalnaj dalokaści «Buravieśnik».