U Breście karanavirus znajšli ŭ studentki ź Viciebska
U Bresckaj vobłaści źjaviŭsia druhi zaražany COVID-19. Pra dziaŭčynu, što zachvareła, Tut.by paviedamili čytačy.
Pa słovach čytački, karanavirus vyjavili ŭ studentki ź Viciebska, jakaja lažała ŭ Centralnaj haradskoj balnicy Bresta.
— Jana pryjechała dadomu, trapiła ŭ špital z padazreńniem na pnieŭmaniju. Niekalki čałaviek byli ź joj u pałacie. Adna ź jaje susiedak — supracoŭnica adnoj ź miedustanoŭ Bresta. Usich nočču pieravieźli ŭ abłasnuju «infiekcyjonku» [infiekcyjnaje adździaleńnie Bresckaj abłasnoj kliničnaj balnicy]. Baćkoŭ dziaŭčyny — taksama, — raspaviała čytačka.
Dziaŭčynie 20 hadoŭ, vučycca ŭ Viciebskim dziaržaŭnym miedycynskim univiersitecie. Paśla pierachodu VNU na dystancyjnaje navučańnie jana pajechała ŭ Brest. U telefonnaj razmovie z Tut.by pacyjentka paćvierdziła, što ŭ jaje znajšli karanavirus. Ciapier jana ŭ adzinočnaj pałacie infiekcyjnaha adździaleńnia Bresckaj abłasnoj kliničnaj balnicy.