Dokšyckaja plama. Za niekalki dzion u maleńkim haradku ad pnieŭmanii pamierli, jak minimum, troje
Dokšycy na słychu apošnimi dniami — u nievialikim horadzie na 7 tysiač žycharoŭ naličyłasia 85 chvorych na pnieŭmaniju.
Siarod ich jość i ludzi z karanavirusam, ale ŭłady pakul nie paviedamili dakładnuju kolkaść inficyravanych.
Dadzienaja kolkaść pnieŭmanij była pa stanie na pazaŭčora, 7 krasavika.
Čytajcie: U Dokšycach 85 chvorych na pnieŭmaniju
Miž tym, žychary horada sihnalizujuć «Našaj Nivie», što tolki za apošnija niekalki dzion siarod hetych pnieŭmanij trapilisia try śmiarotnyja vypadki.
Dokšycy, fota Maršrut.bieł
Ranicaj 9 krasavika ŭ miascovaj balnicy pamior piensijanier Alaksandr Škiełka, jamu było kala 65 hadoŭ.
Pra śmierć mužčyny «Našaj Nivie» paviedamili ŭ siamji jaho brata. Aficyjnaja pryčyna śmierci — dvuchbakovaja pnieŭmanija.
«Jon spačatku byŭ doma, tempieratura była 39. Paśla daktary vyrašyli zabirać jaho ŭ balnicu, tudy pakłali i jaho žonku. U abaich dyjahnastavali pnieŭmaniju. Alaksandru stała horš, jaho pieraviali ŭ reanimacyju, niekatory čas lažaŭ pad aparatam štučnaj vientylacyi. I ŭsio — niama čałavieka. Adkul što ŭziałosia, niezrazumieła», — kažuć svajaki.
Ci byŭ u mužčyny karanavirus, pakul nichto nie viedaje.
«Paviazuć u Połack, tam ci to buduć uskryvać, ci to što. Moža, tady budzie štości viadoma», — kažuć svajaki.
Žonka Alaksandra Škiełki ŭsio jašče sama lažyć u balnicy ź pnieŭmanijaj.
Raniej, 7 krasavika, pamior piensijanier pa proźviščy Paševič. Jahony syn raskazaŭ «Našaj Nivie», što baćka zaniadužaŭ tydni dva tamu — prastudziŭsia, kali jechaŭ na rovary. Zapaliłasia vucha, potym znajšli pnieŭmaniju. Jana i stała pryčynaj śmierci.
«Vazili na ŭskryćcio ŭ Połack, analiz na karanavirus brali, ale vynikaŭ niama. U mianie analizaŭ nie brali, dyj nijakich rekamiendacyj chavać u zakrytaj trunie nie było. U paśviedčańni ab śmierci napisana pnieŭmanija», — raskazaŭ syn i dadaŭ, što naziraje ŭ horadzie paniku, ale nie viedaje «z rezonam ci biez rezonu».
Ad daktaroŭ miascovaj balnicy nam stała viadoma pra treciaha pamierłaha ŭ hetyja ž dni. Pakul reparciory nie zdoleli źviazacca ź siamjoj Ściapana K. — nibyta čałaviek u bojcy paškodziŭ rebry, a ŭ balnicy jamu dyjahnastavali pnieŭmaniju.
Svajaki inšaha žychara Dokšycaŭ, techničnaha rabotnika miascovaha Doma kultury, raskazvajuć, što jon znachodzicca na aparacie štučnaj vientylacyi lohkich.
Taksama ŭ balnicy pa-raniejšamu znachodziacca manachi-kapucyny, jakija źlahli ź pnieŭmanijami.
Čytajcie. «Lažać pad kropielnicami». U Dokšycach katalickija śviatar i manach trapili ŭ balnicu ź pnieŭmanijami
Śviatar Aleh Šenda skazaŭ «Našaj Nivie», što stan manachaŭ zadavalniajučy — paćvierdžanych testaŭ na karanavirus niama, pieršyja akazalisia admoŭnymi.
Dokšycki rajon mieścicca ŭ zachodniaj častcy Viciebskaj vobłaści. U im žyvie ŭsiaho kala 22 tysiač čałaviek. U samich Dokšycach žyvie kala 7 tysiač čałaviek.