Z radyjo «Stalica» zvolnilisia dźvie traciny rabotnikaŭ na čale z dyrektaram
Na biełaruskamoŭnym radyjo «Stalicy» pracavała 18 rabotnikaŭ. 12 ź ich zvolnilisia.
«Učora zabrali pracoŭnyja knižki. Na radyjo zastalisia tyja, chto ŭ adpačynku ci ŭ dekrecie, — raskazaŭ «Našaj Nivie» Aleh Michalevič, ciapier užo były kiraŭnik «Stalicy». — Zvalnialisia pa ŭzajemnaj zhodzie. Zastacca nie prymušali i nie ŭhavorvali».
Aleh Michalevič
Pryčynaj masavaha zvalnieńnia Michalevič nazyvaje apošnija padziei ŭ krainie.
«Žudasnyja padziei prymusili nas zrabić taki vybar. Naša stancyja — muzyčna-infarmacyjnaja, rabotniki prosta nie mahli ŭklučać mikrafon, pracavać i zabaŭlać ludziej, kali ŭ krainie takoje adbyvajecca. I psichična, i maralna vielmi ciažka: žadać dobraha ranku i być u dobrym nastroi ŭ taki čas.
Dziaŭčaty kazali mnie: nie zmožam i słova skazać, prosta ŭklučym mikrafon i budziem płakać.
U maim domie byli susiedzi, jakija paciarpieli ad siłavikoŭ. I było ciažka štodnia sustrakać čałavieka i hladzieć jamu ŭ vočy. Bo ludzi ž viedajuć, što ja pracuju na dziaržaŭnym ŚMI,
— raspavioŭ Aleh Michalevič. — Tamu na radyjostancyi my padrychtavali zvarot, ź jakim chacieli źviarnucca da našych słuchačoŭ. Chacieli pačać raskazvać naviny z dvuch bakoŭ, ale nam nie dazvolili heta zrabić. Skazali: vy dziaržaŭnaje radyjo, patrebna z adnaho boku raskazvać. Dyj vy muzyčnaja stancyja. Maŭlaŭ, dla kamientaraŭ i palityki jość inšyja radyjostancyi».
Michalevič kaža, što kalektyŭ prymaŭ udzieł i ŭ šeściach u padtrymku pieramienaŭ, rabotniki «Stalicy» padtrymlivali la BT televizijščykaŭ, jakija bastavali.
Ciapier ža ludzi syšli ŭ nikudy, jak i 54-hadovy Michalevič.
«Pakul novaj pracy niama. Chaču krychu pryjści ŭ siabie, adpačyć, pryvieści ŭ paradak dumki, bo dva tydni amal nie spaŭ. A nakont prapanoŭ: ludzi pišuć, padtrymlivajuć, abiacajuć dapamahčy z pošukam pracy», — kaža Aleh Michalevič.