Hałoŭny redaktar «Bresckaj haziety» paprasiŭ admovicca ad padpiski na 2021 hod
Admovicca ad padpiski na «Bresckuju hazietu» na pieršaje paŭhodździe 2021 hoda paprasiŭ čytačoŭ hałoŭny redaktar vydańnia Viktar Marčuk. Tych, chto ŭžo padpisaŭsia, jon paprasiŭ jaje anulavać u najbližejšy čas. U svaim zvarocie hałoŭny redaktar padkreśliŭ, što prośba hetaja «vielmi dziŭnaja» dla niezaležnaha drukavanaha ŚMI, ale «situacyja vymušaje», piša Tut.by.
U liście da čytačoŭ Viktar Paŭłavič patłumačyŭ, što ŭ tych umovach, u jakija siońnia sprabujuć pastavić «BH», redakcyja nie ŭpeŭnienaja, što zmoža vykanać svaje abaviazacielstvy pierad padpisantami.
«Udakładniu: toje, što tyčycca padrychtoŭki papiarovaj viersii haziety da druku, my, biezumoŭna, zrobim. Ale pamiž redakcyjaj i čytačami jość niekalki źvionaŭ adnaho łancuha. Pierš za ŭsio — heta drukarnia i pošta. Jak pakazvajuć apošnija padziei, kiraŭniki hetych pradpryjemstvaŭ siońnia, miakka kažučy, nie vielmi zacikaŭleny ŭ tym, kab vy atrymlivali «BH», jak i raniej», — napisaŭ hałoŭny redaktar.
Viktar Paŭłavič nahadaŭ, što paśla 18 hadoŭ supracoŭnictva «Bresckaja drukarnia» biez tłumačeńnia pryčyn admoviłasia z Novaha hoda drukavać hazietu. Zaraz kalektyŭ redakcyi pracuje nad rašeńniem hetaj prablemy:
«Pakul varyjantaŭ, dzie my mahli b drukavać «BH», nie bajučysia, što z nami nie robiać taki ž fokus, u nas niama. Reč u tym što druk haziet u Biełarusi — heta asablivaja prerahatyva. U cełym, dziaržmanapolija. Licenzii na akazańnie takich pasłuh majuć dziaržaŭnyja drukarni. Za vielmi redkim vyklučeńniem. A, jak pakazvaje situacyja z «BH» i šeraham inšych drukavanych vydańniaŭ, u hetaj śfiery zakony ekanomiki, rynku, dy i prosta zdarovy sens nie zaŭsiody pracujuć naležnym čynam. Takija asablivaści ciapierašnich biełaruskich realij».
Da studzienia hazieta budzie drukavacca ŭ «Bresckaj drukarni». Adnak raniej pradpryjemstva ŭ adnabakovym paradku źmianiła čas druku nakładu «BH», pieramiaściŭšy z 9.00 na 15.00. Pry hetym pa damovie z «Biełpoštaj» nakład vydańnia pavinien być zdadzieny va ŭčastak pa apracoŭcy i abmienie pošty pa čaćviarhach nie paźniej za 15.00.
«Ale jak my možam zdać nakład haziety va ŭčastak u abumoŭleny ŭ damovie čas, kali čarhovy numar u 15.00 tolki pačynajuć drukavać? Vielmi vidavočnaja časovaja niestykoŭka (abo stykoŭka) atrymałasia, kab być vypadkovaściu», — padkreślivaje Viktar Marčuk.
Padpisvać z redakcyjaj dadatkovaje pahadnieńnie, jakoje praduhledžvaje pieranos zdačy nakładu na bolš poźni čas, kiraŭnictva Bresckaha filijała «Biełpošty» admoviłasia. Siońnia ŭ vydańnia niama harantyj, što ŭ 2021 hodzie padobnaja praktyka nie paŭtorycca.
«My nie ŭpeŭnienyja, što zmožam zabiaśpiečyć vykanańnie ŭmoŭ, prapisanych u damovie z «Biełpoštaj» A značyć, jość realnaja pahroza ŭžyvańnia ŭ dačynieńni da redakcyi «BH» finansavych sankcyj, razryvu damovy i samaje niepryjemnaje — nievykanańnia abaviazacielstvaŭ pierad padpisantami. U taki kapkan užo trapiła «Narodnaja Vola». Tamu, uzvažyŭšy ŭsie za i suprać, my pryjšli da rašeńnia admovicca ad pasłuh «Biełpošty» pa padpiscy na pieršaje paŭhodździe 2021 hoda» — napisaŭ hałoŭny redaktar.
Apaviaščeńnie pra heta vydańnie nakiravała ŭ Biełpoštu 17 śniežnia.
«Kali vy ŭžo padpisalisia na miesiac, kvartał abo pieršaje paŭhodździe 2021 hoda, kali łaska, anulujcie padpisku ŭ samy bližejšy čas.( … ) Dziakuj za toje, što byli z nami! Spadziajemsia, što bolšaść z vas zastaniecca z vašaj lubimaj hazietaj i ŭ nastupnym hodzie. Praŭda, ciapier treba budzie kuplać jaje ŭ roźnicu».