Novy preparat moža stać praryvam u lačeńni raku mozha
Brytanskija navukoŭcy vyjavili, što ekśpierymientalny preparat ipatasiertyb moža zrabić efiektyŭnaj imunaterapiju dla lačeńnia raku mozha.
Ekśpierymientalnaje lačeńnie značna palepšyła stan dvuch pacyjentaŭ z rakam mozha na apošniaj stadyi. U adnym vypadku śmiarotnaja puchlina źnikła. Brytanskija daktary papiaredžvajuć, što vyniki pakul papiarednija, ale takaja stanoŭčaja reakcyja na lačeńnie — redki vypadak, paviedamlaje The Guardian.
Daktary ź Instytuta ankałohii i Karaleŭskaj balnicy Marsden praviali pieršuju fazu kliničnych vyprabavańniaŭ terapii Ice-Cap. U lačeńni ŭziali ŭdzieł dziesiać pacyjentaŭ z hlijabłastomaj — najbolš raspaŭsiudžanaj i ahresiŭnaj formaj raku.
Usie pacyjenty atrymlivali imunaterapieŭtyčny preparat atezalizumab (atezolizumab) u spałučeńni ź ipatasiertybam (ipatasertib) — ekśpierymientalnymi lekami, jakija robiać rakavyja kletki bačnymi dla imunnaj sistemy.
Bolšaść udzielnikaŭ mieła puchlinu z defiektami ŭ hienie Pten. Ipatasiertyb błakuje malekułu Akt, jakuju dla rostu i pašyreńnia vykarystoŭvajuć tyja typy raku, dzie nie pracuje hien Pten. Heta tłumačyć, čamu pacyjenty z defiektami Pten lepš za astatnich reahujuć na ekśpierymientalnaje lačeńnie.
U adnaho z pacyjentaŭ puchlina ŭ mozhu źnikła sa zdymkaŭ i nie źjaŭlajecca ŭžo na praciahu 20 miesiacaŭ.
«Rak mozha moža chavacca ad imunnaj sistemy składanymi šlachami, tamu da hetaha času imunaterapija nie pracavała, — adznačaje kiraŭnik daśledavańnia. — Adnak prymianieńnie ipatasiertybu pakazała, što rak mozha moža stanavicca ŭraźlivym. Heta daśledavańnie daje šturšok nastupnym raspracoŭkam, jakija mohuć stać revalucyjnymi ŭ lačeńni hlijabłastomy».