«Uźnikaje pytańnie: navošta takaja stancyja treba?» Biełaruskaja AES nie budzie pracavać da siaredziny žniŭnia
12 lipienia Ministerstva enierhietyki paviedamiła, što pieršy enierhabłok BiełAES adklučany ad sietki aŭtamatyčnaj abaronaj hienieratara, «pryčyny ŭstanaŭlivajucca, paśla ich vyrašeńnia enierhabłok budzie ŭklučany ŭ rabotu». 23 lipienia Minenierha zajaviła, što na pieršym enierhabłoku «pravodzicca revizija i dyjahnostyka abstalavańnia turbahienieratara». Uklučyć błok u sietku płanujuć da siaredziny žniŭnia. Jak razumieć usie hetyja suchija farmuloŭki?
«Naša Niva» źviarnułasia pa kamientar da enierhietyka.
«Z aficyjnych paviedamleńniaŭ možna zrabić vysnovu, što z reaktaram usio dobra — «lasnuła» elektryčnaja častka. Hruba kažučy, schiema nastupnaja: atamny reaktar vypracoŭvaje haračuju vadzianuju paru, para pad ciskam krucić turbinu, turbina krucić hienieratar, jaki vypracoŭvaje elektryčnaść niepasredna ŭ sietku. I pałomka, vynikaje, u apošnim punkcie, jaki z reaktaram nie źviazany. Adzinaje, što ciapier AES nie daje ni kropli enierhii ŭ sistemu, na heta možna nie źviartać uvahi, kali chapaje mahutnaściaŭ inšych stancyj u krainie. Ale ŭźnikaje pytańnie, navošta takaja stancyja treba. Jak ja pamiataju, byli abiacańni paadklučać proćmu elektrastancyj paśla pusku AES, tuju ž Łukomlskuju DRES, ale z takimi častymi adklučeńniami i niaŭciamnaj rabotaj AES hetaha rabić pakul što nie vypadaje.
Da taho ž, sam uvod enierhabłoka nazad u sistemu, paśla vypraŭleńnia chibaŭ, heta sprava nie niekalkich chvilin, a vielmi składanaja apieracyja, dzie treba ŭličvać mnostva faktaraŭ, kab nie zavalić usiu enierhasistemu», — skazaŭ enierhietyk.
Nahadajem, vypłata pa rasijskim kredycie za budaŭnictva AES miełasia pačacca 1 krasavika 2021-ha, ale była pieraniesiena na 2023 hod.