Pravaabaroncy Marfie Rabkovaj u SIZA błakujuć listy i nie dajuć prajści miedabśledavańnie
U palitźniavolenaj pravaabaroncy Marfy Rabkovaj znoŭ nie atrymlivajecca damahčysia miedycynskaj dapamohi, a jaje listy błakujuć praz zhadvańnie ŭ ich vystaŭlenych kryminalnych artykułaŭ.
Na praciahu apošniaha tydnia (kaniec listapada — pačatak śniežnia) Marfa Rabkova sprabavała damahčysia pryznačeńnia UHD (ultrahukavoje daśledavańnie), napisała šeść zajaŭ. Adnak paśla hetaha nie było «nijakaj reakcyi», paviedamiła Marfa ŭ adnym sa svaich listoŭ.
«U mianie ž nie tak daŭno znoŭ była amal nieprytomnaść ad spazmatyčnych bolaŭ», — napisała jana.
Akramia taho, administracyja SIZA nie vypuskaje listy Rabkovaj, u jakich jana paviedamlaje pra kolkaść vystaŭlenych joj kryminalnych artykułaŭ ci ahučvaje niekatoryja ź ich. Hetyja listy administracyja paprostu joj viartaje.
«Pryncypova adpraŭlaju ich nazad bieź źmien, bo heta nie źjaŭlajecca tajamnicaj śledstva, — raspaviała Rabkova pra svaju reakcyju. — Ukłała ŭčora ŭ list zapisku cenzaru, dzie raśpisała, što niama takich pravavych normaŭ, pavodle jakich ja nie mahu napisać artykuły. Ja ž nie pišu pra sutnaść abvinavačvańnia, u čym kankretna mianie abvinavačvajuć».
***
Marfie Rabkovaj vystaŭlena 11 artykułaŭ Kryminalnaha kodeksa. Joj pahražaje da 20 hadoŭ źniavoleńnia. Jaje zatrymali 17 vieraśnia 2020 hoda.
Śpis artykułaŭ:
- č. 1 art. 293 (Arhanizacyja masavych biesparadkaŭ)
- č. 1 art. 13 da č. 2 art. 293 (Padrychtoŭka i naŭmysnaje stvareńnie ŭmoŭ da ŭdziełu ŭ masavych biesparadkach)
- č. 3 art. 293 (Navučańnie ci inšaja padrychtoŭka asob dla ŭdziełu ŭ masavych biesparadkach, a roŭna finansavańnie ci inšaje materyjalnaje zabieśpiačeńnie takoj dziejnaści)
- č. 1 art. 342 (Arhanizacyja hrupavych dziejańniaŭ, jakija hruba parušajuć hramadski paradak)
- č. 3 art. 361 (Zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś z vykarystańniem srodkaŭ masavaj infarmacyi abo hłabalnaj kampjutarnaj sietki Internet)
- č. 1 art. 361-1 (Stvareńnie ekstremisckaha farmavańnia)
- č. 1 art. 285 (Kiraŭnictva złačynnaj arhanizacyjaj)
- č. 3 art. 130 (Raspalvańnie sacyjalnaj varožaści hrupaj asob)
- č. 2 art. 339 (Złosnaje chulihanstva)
- č. 3 art. 339 (Asabliva złosnaje chulihanstva)
- art. 341 (Apahańvańnie zbudavańniaŭ i psavańnie majomaści)
- č. 3 art. 218 (Naŭmysnyja źniščeńnie abo paškodžańnie čužoj majomaści, učynienyja arhanizavanaj hrupaj)
- č. 2 art. 295-3 (Niezakonnyja dziejańni ŭ dačynieńni da pradmietaŭ, dziejańnie jakija zasnavanaje na vykarystańni haručych rečyvaŭ, učynienyja hrupaj asob).