«Praviarajecca bolš za 200 čałaviek». HUBAZiK pačaŭ zavodzić kryminalnyja spravy za «charuhvy»
Siłaviki vyrašyli zaniacca stvoranaj za miažoj arhanizacyjaj «Paspalitaje Rušeńnie» i «charuhvami», jakija tudy ŭvachodziać.
Jany abvinavačvajuć udzielnikaŭ, što tyja dziejničajuć sumiesna z BYPOL, mabilizacyjnym płanam «Pieramoha» i Abjadnanym pierachodnym kabinietam i «pravodziać rabotu pa arhanizacyi zamachaŭ na terytaryjalnuju cełasnaść, suvierenitet, asnovy kanstytucyjnaha ładu i hramadskuju biaśpieku Respubliki Biełaruś».
«Hetuju arhanizacyju płanujecca vykarystoŭvać u tym liku dla destabilizacyi abstanoŭki ŭnutry krainy ŭ pieryjad praviadzieńnia elektaralnych kampanij 2024—2025 hadoŭ», — ličyć HUBAZiK.
Śledčyja raspačali kryminalnyja spravy na Valeryja Sachaščyka, Śviatłanu Cichanoŭskuju i Alaksandra Azarava — za stvareńnie ekstremisckaha farmiravańnia albo ŭdzieł u im. Siłaviki dadajuć, što pa kryminalnaj spravie praviarajecca «bolš za 200 čałaviek».